Kandidat Qasym-Jomart Toqaev elordadaǵy «Astana Opera» teatrynda ornalasqan №115 sailaý ýchaskesinde óz daýysyn berdi, dep habarlaidy "Ult aqparat".
«Búgin elimiz úshin erekshe tarihi kún. Azamattarymyz óz konstitýtsiialyq quqyǵyn paidalanyp sailaýda daýys berýde. Bul halqymyzdyń jarqyn bolashaǵy úshin jasaityn tańdaýy. Sailaý menińshe bul úlken mereke. Sailaý - bul kandidattardyń el bolashaǵy úshin jasalatyn usynystary men baǵdarlamalarynyń básesege túsetin dodasy. Elimizdiń basty qundylyǵy ol - tatýlyq, birlik, yntymaq. Sondyqtan qai kezde de basty qundylyqtarymyzdy kózdiń qarashyǵyndai saqtaýymyz qajet. Búgingi básekeniń zańǵa sáikes demokratiialy túrde ótetinine senim bildiremin», - dedi Q. Toqaev.
№115 ýchaskede birinshi bolyp daýys bergen sailaýshy – astanalyq Ásel Qiianbekova. Ol dál osy ýchaskege Qasym-Jomart Toqaevtyń keletinin bilmegen.
"Men Qasym-Jomart Toqaevtyń dál osy jerge kelip, daýys beretinin bilmeppin. Árine, qýanyshtymyn. Sailaý - barsha qazaqstandyqtar úshin asa mańyzdy shara. Bul - aldaǵy besjyldyqtyń bolashaǵy ǵana emes, jalpy keleshegimizdiń jaýapty bir kezeńi, balalarymyzdyń bolashaǵy. Sondyqtan árbir adam kelip, óz daýysyn berýge mindetti degen oidamyn", - dep atap kórsetti Qiianbekova.
Aita ketsek, Qasym-Jomart Toqaev daýys bergen sailaý ýchaskesinde barlyǵy 2 500 adam tirkelgen, qazirgi ýaqytta onyń myńǵa jýyǵy óz tańdaýyn jasady.
Eske sala ketsek, búgin Qazaqstan Prezidentin kezekten tys sailaý bastaldy. QR Prezidentiniń kezekten tys sailaýynda el ishinde jáne shet elderde 9 968 daýys berý ýchaskesi jumys isteidi. Sailaý týraly Konstitýtsiialyq zańǵa sáikes, daýys berý ýaqyty standartty (saǵat 7.00-20.00 aralyǵy) bolady.
