Memleket basshysy Qasym-Jomart Toqaev jedelhatta Resei Prezidenti Vladimir Pýtindi jáne barsha reseilikterdi ulttyq merekesi – Resei kúnimen quttyqtady, dep habarlaidy Aqorda.
«Resei Federatsiiasy óziniń jańa tarihynda osy ataýly kúndi halyqaralyq turaqtylyq pen qaýipsizdikti qamtamasyz etýge, jańa syn-tegeýrinder men qaterlerge qarsy is-qimyldarǵa, álemdik qaýymdastyq músheleri arasyndaǵy ózara tiimdi jáne ádil yntymaqtastyqty damytýǵa úlken úles qosyp otyrǵan qýatty ári bedeldi derjava retinde atap ótedi. Sizdiń strategiialyq baǵytyńyzdy qatań ustana otyryp, Resei memlekettik qurylymnyń san ǵasyrlyq dástúrin tabysty arttyryp, qoǵamdyq ómirdiń barlyq salasyn dáiekti túrde jańǵyrtyp keledi» delingen jedelhatta.
Sonymen qatar Qazaqstan Prezidenti reseilikterdiń patriotizm men birlikke beiildigi, Otandaryna degen maqtanysh sezimi men jarqyn bolashaqqa degen nyq senimi Resei memleketiniń turaqty damýyna jáne ál-aýqatynyń artýyna kepil bolatynyn atap ótti.
Qasym-Jomart Toqaev Vladimir Pýtinge Qazaqstan men Resei arasyndaǵy dostyq bailanysty jáne odaqtastyqty odan ári nyǵaitýǵa baǵyttalǵan jemisti eńbegi úshin rizashylyǵyn bildirdi.
