Resei – Qazaqstannyń negizgi saýda-ekonomikalyq seriktesi. Bul pikirdi Memleket basshysy Qasym-Jomart Toqaev Reseidiń «Komsomolskaia pravda» gazetine bergen suhbatynda aitty, dep habarlaidy QazAqparat.
«Resei – Qazaqstannyń negizgi saýda-ekonomikalyq seriktesi. Reseiden Qazaqstanǵa tartylǵan tikelei investitsiia kólemi 15,7 milliard dollardy qurady. 2019 jyly ekijaqty taýar ainalymy 2018 jylmen salystyrǵanda 6,2% artyp, 20 milliard dollarǵa jýyqtady. Qazaqstanda 7 myńnan astam reseilik kompaniia men eki eldiń 3,5 myńǵa jýyq birlesken kásiporyndary tabysty jumys istep jatyr. Ekonomikanyń basym salalarynda birlesken jobalar belsendi iske asyrylýda. Máselen, 2018 jyly Reseidiń iri «Polimetall» kompaniiasy investitsiia kólemi 418 million dollar bolatyn «Baqyrshyq» taý-ken óndirý kásipornyn iske qosty. Jalpy quny 6,6 milliard dollardy quraityn 53 investitsiialyq jobany birlesip júzege asyrý josparlanyp otyr», - dedi Qazaqstan Prezidenti.
Q. Toqaev 2019 jyldyń sáýirinde óndiristik kooperatsiia salasyndaǵy birlesken is-qimyl baǵdarlamasy qabyldanǵanyn eske saldy. Sol jyly qazan aiynda baǵdarlamanyń alǵashqy jobasy – Qostanaida «Kirovets» traktorlaryn shyǵarý bastaldy. Onyń qýattylyǵy jylyna 500 traktorǵa deiin jetedi.
«Biz Reseimen munai-gaz, munai-himiia jáne basqa da qaita óńdeý úlesi joǵary ónim shyǵaratyn salalarda yntymaqtastyqty damytýǵa niettimiz. Kaspii qairańynda teńizdegi munai-gaz jobalary boiynsha yntymaqtastyǵymyz nyǵaidy. Qazaqstan Reseige strategiialyq seriktes retinde senim artady. «Lýkoil» kompaniiasy da bizdiń elde tabysty jumys isteýde. Budan bólek, Qazaqstanda investitsiialyq jobalardy júzege asyryp jatqan reseilik bizneske qoldaý kórsetemiz. Osyndai ózara yntymaqtastyqtyń nátijesinde óndiristi Qytai men Ortalyq Aziia naryqtaryna shyǵaramyz dep úmittenemiz», - dedi Memleket basshysy.
Prezidenttiń sózine qaraǵanda, biylǵy kúzde Qazaqstan-Resei forýmyn ótkizý josparlanǵan, onda aimaqtyq ekonomikalyq yntymaqtastyq boiynsha sheshimder qabyldanady.
«Biylǵy kúzde Qazaqstan-Resei forýmyn ótkizý josparlanǵan. Onda aimaqtyq ekonomikalyq yntymaqtastyq jóninde birqatar sheshim qabyldanady. Osy máselege jáne ekijaqty yntymaqtastyqtyń tutas keshenine udaiy nazar aýdaryp otyrǵany úshin Prezident Vladimir Pýtinge rizashylyq bildiremin», - dedi Qasym-Jomart Toqaev suhbat barysynda.
