Iordaniianyń «Petra» memlekettik aqparat agenttiginiń saiasi sholýshysy, Iordaniia Energetika jáne mineraldy resýrstar ministrliginiń spikeri Mashhýr Ábý Eid Qazaqstan Prezidenti Qasym-Jomart Toqaev basshylyǵynyń bir jyldyq qorytyndysy týraly pikir bildirdi, dep habarlaidy QazAqparat.
Mashhýr Ábý Eid Qazaqstanǵa birneshe ret saparlaǵan, 2015 jyly kezekten tys prezident sailaýyn jazýǵa jáne EHRO-2017 halyqaralyq kórmesine barǵan.
Onyń baǵalaýynsha, Qazaqstan Prezidenti Qazaqstandy alǵa damytý úshin ne isteý qajettigin biledi. Ásirese, Prezident Q. Toqaev qurǵan Ulttyq qoǵamdyq senim keńesi az ýaqytta Úkimet pen halyq arasyndaǵy dialogty jaqsarta aldy.
«Ulttyq qoǵamdyq senim keńesi platformasynda úzdik ideialar generatsiiasy iske qosyldy. Onyń ishindegi eń qajettileri júzege asyrylyp jatyr. Tanymal saiasatkerler, shyǵarmashylyq ziiatkerleri, qoǵam qairatkerleri jáne ekonomister eldiń qoǵamdyq-saiasi ómirine belsendi tartylǵan», - dep pikir bildirdi M. Ábý Eid.
Ulttyq keńes usynystaryn eskere otyryp, Prezident Q.Toqaev saiasi reformalar kesheni aiasynda birqatar zańnamalyq aktilerge qol qoidy. Bul aktiler «Halyq únine qulaq asatyn memleket» tujyrymdamasy men azamattyq qoǵamnyń rólin arttyrýdaǵy mańyzdy qadam sanalady.
Spikerdiń aitýynsha, Qazaqstandaǵy jańa quqyqtyq normalar pikirler pliýralizmi, balama kózqarastar, syndarly ustanym jáne sailaýshy aldyndaǵy jaýapkershilik syndy qundylyqtardy nyǵaita túsedi.
Sonymen birge, zańnamaǵa engizilgen túzetýler partiialardyń eldegi saiasi protsesterge yqpalyn arttyrýǵa yqpal etedi. Olar jańa partiia qurýǵa jáne eldegi saiasi partiialar ómirin jandandyrýǵa septigin tigizedi.
Túrli pikirler men usynystardy erkin talqylaý úkimet sheshimderin ázirleýge jáne qabyldaýǵa oń áser etedi.
