Armeniia prezidentiniń keńesshisi, Halyqaralyq adami damý ortalyǵynyń direktory Tevan Pogosian jáne saiasi sholýshy Aik Halatian Qasym-Jomart Toqaevtyń Qazaqstan Prezidenti qyzmetindegi negizgi qadamdary jóninde pikir bildirdi, dep habarlaidy QazAqparat.
Tevan Pogosiannyń pikirinshe, Q. Toqaevtyń bir jyldyq qyzmetinde Qazaqstan óziniń evoliýtsiialyq bilik sabaqtastyǵy modelin kórsete aldy. Bul ýaqytta Memleket basshysy ózin kelissóz júrgize alatyn, barlyǵyn tyńdap, sheshim qabyldai alatyn adam retinde kórsetti.
Tevan Pogosian bir jylda syrtqy saiasattyń jańa tujyrymdamasy qabyldanǵanyn, onda 2030 jylǵa deiingi basymdyqtar kórsetilgenin atap ótti.
«Jańa tujyrymdamada syrtqy saiasattyń ekonomikalyq quraýshysyn kúsheitýge kóńil bólingen, onyń basty maqsaty - memleket múddesin qorǵaý. Bul múddelerdiń arasynda qaýipsizdik, energetika, ekonomika komponentteri bar. Árine, Qazaqstan jańa tabys kózderi men ekonomikalyq múmkindikterdi izdeidi. Bul - turaqty protsess, ásirese koronavirýs pandemiiasy kezinde barlyq elde azyq-túlik qaýipsizdigi máselesi ózekti bola tústi. Jańa jahandyq geoekonomikalyq jaǵdaida Qazaqstan jańa ekonomikalyq múmkindikter men tabys kózderin nyq senimmen izdestirýde», - dedi T. Pogosian.
Óz kezeginde armian saiasi sholýshysy Aik Halatian Qasym-Jomart Toqaevtyń bir jylda aitýly tabystarǵa qol jetkizgenin atap ótti.
«Ótken jyldaǵy basty jetistikterdiń biri retinde eldegi saiasi jáne ekonomikalyq turaqtylyqty saqtai otyryp júrgizilgen bilik tranzitin aitýǵa bolady. Qazaqstannyń ishki erekshelikterin eskersek, bul - óte mańyzdy. Eldiń ornalasqan aýmaǵy da kúrdeli ári problemalyq aimaq sanalady, onyń ústine Ortalyq Aziiaǵa yqpal júrgizýde jahandyq oiynshylar kúresi júrip jatyr. Alaida, osyǵan qaramastan, Qazaqstan Qasym-Jomart Toqaevtyń jetekshiligimen Resei, AQSh, Qytai, EO jáne aimaqtaǵy kórshi eldermen qarym-qatynasty joǵary deńgeide saqtap, pragmatikalyq jáne kópvektorly saiasatyn jalǵastyryp keledi», - dedi Aik Halatian.
Sonymen birge, Aik Halatian Qazaqstannyń áleýmettik máselelerge jáne qoǵammen dialogqa basa kóńil bólip otyrǵanyn aitty. Bul rette saiasi sholýshy «Halyq únine qulaq asatyn memleket» tujyrymdamasyn, onyń aiasynda Ulttyq qoǵamdyq senim keńesi men Prezidenttiń virtýaldy qabyldaý bólimi qurylǵanyn eske saldy.
«Oǵan qosa, Qasym-Jomart Toqaevtyń jetekshiligindegi qazaqstandyq biliktiń koronavirýs infektsiiasynyń jańa túrimen tiimdi kúres júrgizgenin aitý kerek. Infektsiiamen tiimdi kúres júrgizý - memlekettik apparattyń joǵary atqarý tártibiniń jaqsy kórsetkishi dep esepteimin», - dedi A.Halatian.
