Resmi kezdesý rásiminen keiin memleketter basshylary shaǵyn jáne keńeitilgen quramda kelissózder júrgizdi, dep habarlaidy "Ult aqparat" Aqordaǵa silteme jasap.
Qasym-Jomart Toqaev Qazaqstan Prezidenti laýazymyna kirisýine bailanysty quttyqtaǵany jáne jyly lebiz bildirgeni úshin Vladimir Pýtinge rizashylyq bildirip, óziniń alǵashqy sheteldik saparynyń Resei Federatsiiasyna jasalýynyń simvoldyq mánin atap ótti.
Memleket basshysy Qazaqstan men Reseidiń qazirgi yqpaldastyǵy kópshilik úshin qarym-qatynas jasaýdyń jarqyn úlgisi bolyp sanalatynyn aitty.
– Memleket basshysy retinde men Qazaqstannyń Tuńǵysh Prezidenti – Elbasy Nursultan Ábishuly Nazarbaev saiasatynyń sabaqtastyǵyn qamtamasyz etýge, Qazaqstan men Resei arasyndaǵy ekijaqty yntymaqtastyqty jan-jaqty ári belsendi damytý isin jalǵastyra beremin, – dedi Qasym-Jomart Toqaev.
Qazaqstan Prezidenti eki eldiń ekonomikalyq yntymaqtastyǵyna, ásirese energetika, kólik, tranzit, ónerkásip jáne ǵarysh salalary máselelerine arnaiy toqtaldy.
– Resei Qazaqstannyń syrtqy saýdasyndaǵy «nómiri birinshi» áriptesi bolyp qala beredi. Qazaqstannyń saýda ainalymyndaǵy onyń menshikti salmaǵy 19 paiyz. Investitsiialyq yntymaqtastyq dáiekti damýda. Elimizde Resei kapitaly qatysatyn 9 myńnan astam kásiporyn óz jumystaryn tabysty atqarýda, – dedi Memleket basshysy.
Resei Federatsiiasynyń Prezidenti Vladimir Pýtin Qasym-Jomart Toqaevtyń Memleket basshysy retinde Reseige alǵashqy saparynyń simvoldyq mánin atap ótip, eki el arasyndaǵy bailanystardyń joǵary deńgeide ekenin aitty.
– Bizdiń qarym-qatynasymyzdyń deńgeiin bilesiz jáne ózińiz de buǵan kóp eńbek sińirdińiz, árine Qazaqstannyń Tuńǵysh Prezidenti Nursultan Nazarbaevtyń úlesi zor. Bizdiń jai áriptes qana emes, halyqaralyq uiymdar aiasynda da, ekijaqty bailanystar boiynsha da jaqyn odaqtas ekenimiz sózsiz.
Bizdiń qarym-qatynasymyz óte tiimdi damýda. Naqty ári aiqyn nátijelerge qol jetkizip kelemiz. Bul halyqtarymyzdyń tynys-tirshiliginen kórinis taýyp otyr. Sizdiń búgingi saparyńyz keń aýqymdaǵy ekijaqty odaqtastyq bailanystarymyzdy nyǵaitýǵa septigin tigizetinine senimdimin, – dedi Vladimir Pýtin.
Kezdesý barysynda memleketter basshylary mádeni-gýmanitarlyq saladaǵy memleketaralyq ózara yqpaldastyq máselelerin talqylady, sondai-aq óńirlik jáne halyqaralyq kún tártibindegi ózekti taqyryptar boiynsha pikir almasty.
