QR SIM resmi ókili Aibek Smadiiarov Prezident Qasym-Jomart Toqaev Qyrǵyzstanǵa memlekettik sapary aiasynda qandai máseleler talqylanatynyn aityp ótti, dep habarlaidy "Ult aqparat".
«27 qarashada Qazaqstan Prezidenti Qasym-Jomart Toqaev Qyrǵyzstanǵa memlekettik saparmen barady. Prezidenttiń sapar baǵdarlamasyna respýblika basshysy Sooronbai Jeenbekovpen ekijaqty kelissózder júrgizý, sondai-aq Qazaqstan Respýblikasy men Qyrǵyz Respýblikasy joǵary memleketaralyq keńesiniń kezekti besinshi otyrysyna qatysý engen. Joǵary deńgeidegi kezdesý barysynda saiasi, saýda-ekonomikalyq, investitsiialyq jáne mádeni-gýmanitarlyq saladaǵy ekijaqty ózara is-qimyldyń keń aýqymdy máseleleri qaralatyn bolady», - dedi Aibek Smadiiarov SIM-de ótken baspasóz máslihatynda.
QR SIM resmi ókiliniń aitýynsha, taraptar memleketter basshylarynyń birlesken deklaratsiiasy jáne joǵary memleketaralyq keńestiń sheshimderine, Qazaqstan men Qyrǵyz Respýblikasy arasyndaǵy 2020-2022 jyldarǵa arnalǵan yntymaqtastyq jónindegi keshendi baǵdarlamaǵa, sondai-aq basqa da úkimetaralyq jáne vedomstvoaralyq kelisimderdi bekitý siiaqty ekijaqty birqatar qujattarǵa qol qoiýdy josparlap otyr.
«2019 jyldyń birinshi jartyjyldyǵynyń qorytyndysy boiynsha Qazaqstan men Qyrǵyzstan aralyǵyndaǵy taýar ainalymy 389,4 mln AQSh dollaryn qurady. Bul rette Qazaqstannan Qyrǵyzstanǵa eksporty osy kezeńde 269,2 mln AQSh dollaryn quraǵanyn atap ótken jón», - dedi ol.
Aibek Smadiiarov sondai-aq, 28 qarashada Memleket basshysy Bishkekte Ujymdyq qaýipsizdik týraly shart uiymynyń ujymdyq qaýipsizdik keńesiniń sessiiasyna qatysatynyn atap ótti.
«Uiymǵa múshe memleketterdiń basshylary uiym qyzmeti aiasynda ózara is-qimyldyń keń aýqymdy máselelerin talqylaidy. Sonymen birge, biylǵy jylǵy uiym qyzmettiniń basym baǵyttaryn iske asyrýdyń qorytyndysyn shyǵarady dep kútilýde. Sondai-aq, Ujymdyq qaýipsizdik keńesi Jeńistiń 75 jyldyǵyn merekeleý jónindegi is-sharalar josparyn, 2019-2021 jyldarǵa arnalǵan BUU-nyń terrorizmge qarsy jahandyq strategiiasyn iske asyrý jónindegi uiym elderiniń ujymdyq is-qimyl josparyn, tájik-aýǵan shekarasyndaǵy shielenisti azaitýǵa baǵyttalǵan qosymsha sharalar tizbesin bekitýdi josparlap otyr», - dedi Aibek Smadiiarov.
Eske sala ketsek, Qasym-Jomart Toqaevtyń Qyrǵyzstanǵa memlekettik saparmen baratynyn baspasóz hatshysy Berik Ýáli málim etken bolatyn.
