Búgin Aqordada otandyq jáne sheteldik BAQ ókilderine suhbat bergen QR Prezidenti Qasym-Jomart Toqaev óńirlerdegi sheshimin kútip turǵan basty problemalardy atady, dep habarlaidy QazAqparat tilshisi.
«Rasynda sailaý naýqany kezinde men aimaqtardyń barlyǵyn aralap shyqtym. Árbir aimaqtyń óz ereksheligi bar. Ol zańdy nárse, degenmen, árbir aimaq bizdiń elimizdiń damýyna óz úlesin qosyp otyr. Al shyndyqty aitsaq, elimizde túiini sheshilmegen máseleler bar. Men olardy jaqsy bilemin, sizder de jaqsy bilesizder. Bul - meditsinanyń sapasy, jalaqynyń tómendigi, ekologiia, aýyz sýmen qamtamasyz etý jáne taǵy basqalary. Sondyqtan bul ózekti máselelerdi biz basty nazarǵa alamyz», - dedi Memleket basshysy.
Qazaqstan Prezidenti osy oraida Úkimetke tisti tapsyrmalar beretindigin basa aitty.
«Qazirgi tańda naqty sheshimder qabyldaý kerek. Halyq bizden osy sheshimderdi kútip otyr. Halyq uzaq sózderden ábden sharshady. Sondyqtan men Prezident retinde osy jumyspen mindetti túrde ainalysamyn», - dedi Qasym-Jomart Toqaev.
Sondai-aq, ol sybailas jemqorlyqpen qalai kúresetinin aitty.
"Sybailas jemqorlyq - óte kúrdeli qubylys. Bylai aitqanda dert dep te aitýǵa bolady. Batpandap kiretin, mysqaldap shyǵatyn kesel. Sondyqtan bul dertpen mindetti túrde bárimiz qoǵam bop kúresýimiz kerek. Áitpese kesh bolyp qalýy múmkin. Sybailas jemqorlyqtyń kesirinen alyp memleketter, iri memleketter qulaǵanyn bárimiz bilemiz, kýá boldyq", - dedi Memleket basshysy.
Qazaqstan Prezidenti sybailas jemqorlyq árbir memlekette, sonyń ishinde damyǵan memleketterde de bar ekenin atap ótti.
"Biz sybailas jemqorlyq týraly ashyq túrde aitamyz. Bizde sybailas jemqorlyq - óte úlken problema, qubylys - bizdiń qaýipsizdigimizge syn-qater. Sondyqtan meniń mindetim - sybailas jemqorlyqpen kúresý. Jaqynda, mamyr aiynda osy máselege arnalǵan úlken jinalys boldy. Keshendi is-sharalardy qoldanamyz dep oilaimyn. Bul jóninen halyqqa esep beremiz", - dedi Qasym-Jomart Toqaev.
