Foto: Aqorda
Memleket basshysy "Ana Tili" gazetine suhbat berip, halyqty tolǵandyrǵan suraqtarǵa jaýap berdi. Áńgime barysynda Toqaev Nursultan Nazarbaevpen qanshalyqty jii sóilesetinin aitty. Ol Nazarbaevtyń eńbegin joqqa shyǵarýǵa bolmaidy deidi.
"Biz ádiletti memleket quramyz desek, tarihqa da, ony jasaýǵa atsalysqan azamattarǵa da ádil qaraýymyz kerek. Munyń bári, túptep kelgende, ulttyń bolashaǵy úshin qajet. Ótkendi oi eleginen ótkizip, ony ádil ári shynaiy baǵalai almasaq, alǵa senimmen qadam basa almaimyz. Saiasi ahýaldyń yqpalymen óz tarihyńdy kópe-kórineý burmalai berýge bolmaidy. El shejiresin basynan bastap qaita jazý tipti qaýipti", - deidi ol.
Alaida, alǵashqy jyldary Nursultan Nazarbaev otstavkaǵa ketkenimen, Qaýipsizdik Keńesiniń tóraǵasy bolyp otyrǵan kezde saiasi sypaiylyqty saqtai bermeitinin ashyq aitty.
"Únemi Premer-Ministrdi, Ulttyq banktiń tóraǵasyn, ministrlerdi, ákimderdi shaqyryp alyp, jinalys ótkizetin. Buǵan óz azamattarymyzdy bylai qoiǵanda, shetel basshylary men diplomattary da tańdana qaraityn. «Nazarbaev qyzmetinen ketken soń tipti joǵarylady, endi Prezident te oǵan baǵynady» degen ázil áńgime de paida boldy. Al, shyn máninde, bul ázildeitin jaǵdai emes edi. Bul jaǵdai qosarlanǵan bilik týraly alyp qashpa áńgimeniń órshýine ákep soqty. Sheneýnikter de kabinetten kabinetke júgirip, kimniń tapsyrmasyn oryndaitynyn bilmei dal bolatyn. Ol az deseńiz, keibir sheneýnikter «Elbasy institýty Prezident biliginen joǵary turýǵa tiis» dep, aqylǵa syimaityn jaǵdaidy zań júzinde negizdemek boldy", - dedi Qasym-Jomart Toqaev.
Toqaev sondai-aq burynǵy prezidenttiń sol jyldary Sankt-Peterbýrg qalasynda ótken TMD elderiniń sammitine qatysýyn naǵyz bilik daǵdarysyna ákep soqtyrǵan negizgi oqiǵalar dep atady. Sonyń aldynda ǵana jergilikti bir saiasattanýshy oǵan «Elbasynyń altyn dáýirin» qalpyna keltirý úshin batyl sharalar qabyldaý qajettigin aityp, arandatýshylyq mazmundaǵy hat joldaǵanyn da atap ótti.
Soǵan qaramastan, Nursultan Nazarbaevtyń Qazaqstanǵa sińirgen tarihi eńbegin laiyqty baǵalaitynyn, Prezident retinde memleket múddesin basshylyqqa ala otyryp, qazir shamamen aiyna bir ret telefon arqyly sóilesip turatynyn jetkizdi.
