Búgin Ulttyq qoǵamdyq senim keńesiniń 2-otyrysynda QR Prezidenti Qasym-Jomart Toqaev latyn álipbiine kóshýge qatysty pikir bildirdi, - dep habarlaidy «Ult aqparat».
«Latyn grafikasyndaǵy álipbige kóshý máselesinde asyǵystyq tanytýǵa bolmaidy. Tyńǵylyqty, tekserilgen ustanym talap etiledi. Jan-jaqty saraptaý jáne jańa álipbidiń barlyq aspektilerin ázirleý qajet. Latyn álipbiiniń usynylǵan úsh nusqasy da jetildirilmegen bolyp shyqty. Sondyqtan bul problemada shynaiy ǵylymi ádis kerek jáne jeńildetýge bolmaidy» dedi Memleket basshysy.
QR Prezidenti kirilitsany latynǵa jai ǵana aýystyrý tóńireginde sóz bolyp otyrmaǵandyǵyn aitty.
«Qazaq tiline reforma, tipti qajet deseńizder tilimizdi jańǵyrtý qajet. Ǵalymdarymyzdyń salmaqty pikirlerin kútemiz. Taǵy da qaitalap aitamyn, biz naqty qazaq tilin reformalaimyz. Mundai ultymyz úshin taǵdyrsheshti máselede naýqanshyldyqqa jáne jeńiltektikke jol berýge bolmaidy» dedi Qasym-Jomart Toqaev.
