Taraptar qazaq-korei strategiialyq áriptestigin odan ary damytýdyń perspektivalaryn jan-jaqty talqylady. Saýda-ekonomikalyq, investitsiialyq jáne mádeni-gýmanitarlyq bailanystardy nyǵaitýǵa erekshe kóńil bólindi.
Qasym-Jomart Toqaev Prezident Mýn Chje Inge korei jerinde kórsetilgen qurmet pen qonaqjailyǵy úshin rizashylyǵyn bildirdi.
Memleket basshysy 2019 jyly Nur-Sultan qalasynda ótken kezdesýdiń qazaq-korei qarym-qatynasyna tyń serpin bergenin aitty.
Qasym-Jomart Toqaev Ońtústik Koreia Qazaqstannyń Aziiadaǵy eń mańyzdy strategiialyq áriptesi ekenin atap ótti.
– Búgingi tańda Qazaqstannyń ekonomikasyna 6 mlrd dollardan astam koreilik investitsiia tartylǵan. Investitsiia tartý isin budan bylai da jalǵastyra berý kerek dep oilaimyn. Men osydan eki jyl buryn ózara bailanystarymyzdy arttyrý úshin aýqymdy joba qurý kerek ekenin Sizge aitqanmyn. Qazir Qazaqstanda koreialyqtar qarjy salǵan 550 kompaniia jumys istep jatyr. Olardyń arasynda Samsung, Hyundai, Lotto, Posko jáne taǵy basqalary bar. Óte jaqsy institýtsionaldy baza qalyptasqan, úkimetaralyq komissiia men iskerlik keńes jumys istep jatyr, – dedi Qazaqstan Prezidenti.
Memleket basshysy koreialyq áriptesine koronavirýspen kúreste kórsetken gýmanitarlyq kómegi úshin alǵys aityp, qazaqstandyq QazVac vaktsinasy týraly aqparatpen bólisti.
Qasym-Jomart Toqaev Ońtústik Koreianyń joǵary tehnologiialar men densaýlyq saqtaý salasyn damytý tájiribesine qyzyǵýshylyq tanytty.
Ońtústik Koreia Prezidenti pandemiia bastalǵaly beri osyndai joǵary deńgeidegi kezdesýdi eń birinshi bolyp Qazaqstan Prezidentimen ótkizip jatqanyn atap ótti.
– Sizdi kóp kútken asa qadirli qonaq retinde kútip alǵanyma qýanyshtymyn. Bizdiń kezdesýimizdiń Qazaqstan Táýelsizdiginiń 30 jyldyǵy men Korei Respýblikasy Táýelsizdiginiń 76 jyldyǵy qarsańynda ótip jatqany asa mańyzdy, – dedi Prezident Mýn Chje In.
Ońtústik Koreia Prezidenti Mýn Chje In Qasym-Jomart Toqaevqa jáne Qazaqstan halqyna Koreianyń ulttyq batyrlary, el táýelsizdigi úshin kúresken Ge Bon Ý, Hvan Ýn Dena jáne general Hon Bon Donyń súiekterin tarihi Otanyna jetkizýge yqpal etkeni úshin rizashylyǵyn bildirdi.
Korei basshysy aimaqtyq jáne halyqaralyq úderisterde Qazaqstannyń asa mańyzdy ról atqaratynyn atap ótti.
– Qazaqstan Táýelsizdik alǵannan keiin syrtqy saiasatta ashyq ári tyǵyz bailanys ornatyp, belsendilik tanytý arqyly Ortalyq Aziiadaǵy qyrqyndy damýshy memleketke ainaldy. Sonymen qatar Qazaqstan Aziiadaǵy ózara yntymaqtastyq jáne senim sharalary jónindegi keńes arqyly jáne Dúniejúzilik saýda uiymyndaǵy ministrler konferentsiiasynyń teńtóraǵasy retinde de kópjaqty yntymaqtastyqtyń ártúrli tetikterinde belsendi kóshbasshylyq tanytyp keledi. Qazaqstan Koreia Respýblikasynyń Ortalyq Aziiadaǵy eń alǵashqy saýda jáne investitsiialyq áriptesi. Elderimiz arasyndaǵy diplomatiialyq bailanystar ornaǵan 30 jyl ishinde bizdiń qatynasymyz tek qana dostyq pen yntymaqtastyqqa negizdeldi. Tipti, pandemiia kezinde de biz barlyq deńgeide syrttai bailanys ornatyp otyrdyq. Qazaqstan Koreianyń «Jańa soltústik saiasat» memlekettik strategiiasynda asa mańyzdy áriptes. Bizdiń ózara yntymaqtastyǵymyzdyń áleýeti bunymen de bitpeidi dep esepteimin, – dedi Ońtústik Koreia Prezidenti.
– Korei halqynyń Qazaqstan halqyna degen yqylas-peiili erekshe. Biz úshin Qazaqstan Eýraziia qurlyǵynyń ortalyǵy bolyp sanalady. Bizdiń halyqtarymyzdyń tarihi bailanysy sonaý Uly Jibek jolynan tartyp, keiingi etnikalyq koreilerdi Qazaqstanǵa jer aýdarýmen jalǵasty. Biz Qiyr Shyǵystan jer aýdarylyp barǵan koreilerdi óziniń ystyq qushaǵyn jaiyp qarsy alǵan qazaq halqynyń keń peiildigin eshqashan umytpaimyz, alǵysymyz sheksiz, – dedi Ońtústik Koreia Prezidenti.
Kelissózderdiń qorytyndysy boiynsha memleketter basshylarynyń qatysýymen birqatar ekijaqty qujatqa qol qoiyldy:
1. Qazaqstan Respýblikasy men Koreia Respýblikasynyń Birlesken málimdemesi (aýyzsha qabyldandy);
2. Qazaqstan Respýblikasynyń Mádeniet jáne sport ministrligi men Koreia Respýblikasynyń Ishki ister jáne qaýipsizdik ministrligi arasyndaǵy muraǵat isi salasyndaǵy ózara túsinistik týraly memorandým;
3. Qazaqstan Respýblikasynyń Saýda jáne integratsiia ministrligi men Koreia Respýblikasynyń Saýda, indýstriia jáne energetika ministrligi arasyndaǵy ózara túsinistik týraly memorandým;
4. Qazaqstan Respýblikasy Ekologiia, geologiia jáne tabiǵi resýrstar ministrligi men Koreia Respýblikasynyń Qorshaǵan orta ministrligi arasyndaǵy sý resýrstaryn basqarý salasyndaǵy ózara túsinistik týraly memorandým;
5. Qyzylorda oblysy ákimdigi men Koreia Respýblikasynyń Ardagerler men patriottar jónindegi agenttigi arasyndaǵy ózara túsinistik týraly memorandým;
6. «Samuryq-Qazyna» UÁQ» AQ men Koreia halyqaralyq saýda qaýymdastyǵy (KITA) arasyndaǵy yntymaqtastyq týraly memorandým.
