Memleket basshysy Qasym-Jomart Toqaev Halyq qaharmany Sát Toqpaqbaevqa airyqsha erekshelik belgisi – Altyn juldyz ben «Otan» ordenderin saltanatty túrde tabystady, dep habarlaidy "Ult aqparat" Aqordaǵa silteme jasap.
«Aqorda» rezidentsiiasynda kórnekti memleket jáne qoǵam qairatkeri, general-polkovnik, ulttyq qaýipsizdik jáne qorǵanys salalarynyń ardageri Sát Besimbaiuly Toqpaqbaevty «Halyq qaharmany» ataǵymen, sondai-aq airyqsha erekshelik belgisi – Altyn juldyz ben «Otan» ordenderimen marapattaý rásimi ótti.
Jiynda Prezident Qasym-Jomart Toqaev arnaiy sóz sóilep, Sát Toqpaqbaevty qalyń jurtshylyq qurmetteitinin, onyń eńbek joly el ómirimen tyǵyz bailanysty bolǵanyn aitty.
"Siz qasterli Otanymyzǵa adal qyzmet ettińiz. Endi ǵana táýelsizdik alyp, derbes memleket bolǵan jyldary asa jaýapty mindetterdi atqarýǵa bilek sybana kirisip kettińiz. Elimizdiń tynyshtyǵy men tutastyǵyn saqtaý úshin orasan zor úles qostyńyz. Shyn máninde, muny naǵyz erlik dep baǵalaýǵa bolady. Qazir de qoǵamǵa paidaly isterdi atqaryp júrgenińizdi biz jaqsy bilemiz. Elimizdiń laiyqty azamatysyz", – dedi Memleket basshysy.
Sát Toqpaqbaev memleketimizdiń qaýipsizdigi jáne elimizdiń tynyshtyǵy jolyndaǵy eńbegin baǵalaǵany úshin Qasym-Jomart Toqaevqa alǵys aitty.
"Ádiletti Qazaqstan qurý isindegi zor eńbegińizdi jáne súiikti Otanymyzdy halyqqa jaily elge ainaldyrý maqsatynda júzege asyryp jatqan saiasatyńyzdy tolyǵymen qoldaimyn. Táýelsizdigimizdiń baiandy bolýy jolynda Sizben árdaiym birgemin! Elimizdiń ishi daýdan, syrty jaýdan aman bolsyn! Otanymyzda tynyshtyq, birlik, aýyzbirshilik árdaiym saltanat qursyn", – dedi Sát Toqpaqbaev.
Saltanatty jiynǵa Memlekettik keńesshi Erlan Qarin, Prezident Ákimshiliginiń Basshysy Aibek Dádebai, Ulttyq qaýipsizdik komitetiniń tóraǵasy Ermek Saǵymbaev qatysty.
