Memleket basshysy Ulttyq qoǵamdyq senim keńesiniń alǵashqy otyrysynyń jumysyna qatysty, dep habarlaidy "Ult aqparat" Aqordaǵa silteme jasap.
Qasym-Jomart Toqaev óz sózinde elimizdi damytýǵa jáne jańǵyrtýǵa baǵyttalǵan bastamalar men usynystardy pysyqtaý isindegi Ulttyq qoǵamdyq senim keńesiniń rólin atap ótti.
– Ulttyq keńestiń árbir múshesiniń ózindik pikiri men ustanymy bar. Bul - damyǵan azamattyq qoǵam úshin qalypty jaǵdai. Biz bárimiz meniń ulyqtaý rásiminde «Ártúrli pikir – biryńǵai ult. Shyn máninde, balamasyz, bastamasyz jáne belsendiliksiz damý bolmaidy. Osy úsh kit ilgerileýdi qamtamasyz etedi» dep aitqan sózimdi negizge alýymyz qajet, – dedi Memleket basshysy.
Qasym-Jomart Toqaev Qazaqstannyń saiasi reformalarynyń alǵa birden júgirip ketpei, aqylǵa salyp, birtindep júzege asyrylatynyn, damýǵa jáne jemisti jumysqa baǵyttalatynyn aitty.
– Keide keibir urandar men úndeýler óte tartymdy kórinedi, biraq olardyń avtorlary memleket aldynda jaýap bermeidi. Reforma reforma úshin – bul daǵdarysqa bastaityn jol ári memlekettiń basqarýyn joǵaltýǵa alyp keledi. Eshqaisymyzdyń muny qalamaityndyǵymyzǵa senimdimin. Damý dáiekti ári údemeli bolýy tiis. Sonda ǵana biz ózimizdiń memlekettilikti saqtaýǵa jáne nyǵaitýǵa baǵyttalǵan azamattyq ári saiasi boryshymyzdy oryndaimyz, – dedi Qazaqstan Prezidenti.
Memleket basshysy memleketimiz úshin mańyzdy ári kókeitesti máseleler jóninde biryńǵai túsiniktiń mańyzdy ekenin aitty, sondai-aq óndiristerdi kóshirýge qatysty qaýesetterge túsinikteme bere otyryp, jerdiń sheteldik azamattarǵa satylmaitynyn taǵy da atap ótti.
– Sońǵy ýaqytta jer sheteldikterge satylady eken nemese kórshi eldiń 55 eski zaýyty kóshiriledi, myńdaǵan sheteldik jumyskerler tartylady eken degen siiaqty túrli qaýeset áńgimeler tarap júr. Halqymyz mundai dańǵaza áńgimelerge ermeýi qajet. Ózderiniń kózdegen maqsattaryna jetý úshin jurttyń patriottyq sezimderin sátti paidalana biletin oiy buzyq adamdar osyndai alyp-qashpa áńgimelerdi shyǵaryp júr. Biliktiń mindeti – qoǵammen dialog júrgizý arqyly memlekettik saiasattyń maqsatyn túsindirý. Men jerdi eshkimge bermeitinimizdi taǵy da aitqym keledi, – dedi Qasym-Jomart Toqaev.
Prezident Qazaqstannyń halyqaralyq yntymaqtastyq, úzdik standarttar men ozyq tehnologiia úshin ashyq ekenin atap ótip, barlyq daýly máseleler konsensýs arqyly sheshiletinin aitty.
– Qazaqstannyń syrtqy ideologiiasynda «halyq jaýy», «besinshi kolonna», «sheteldiń yqpalyna ushyraǵan agentter» siiaqty túsinik joq. Bul - biz úshin jat nárse. Biz óz azamattarymyzdyń adaldyǵy men patriottyǵyna nyq senemiz. Ulttyq tutastyqtyń taǵy bir negizi – damýdyń demokratiialyq úlgisine beiildilik. Biz, eń aldymen, memlekettiligimizdi nyǵaitý missiiasyn basshylyqqa alyp, ratsionaldy ustanymda qalýǵa tiispiz, – dedi Memleket basshysy.
Qasym-Jomart Toqaev memleketti órkendetý úshin barlyq salany jańǵyrtý isi damýdyń strategiialyq maqsattarynyń jáne azamattyq qoǵamnyń pikirine taldaý jasaý negizinde júzege asyrylatynyn aitty.
– Azamattyq qoǵam ókilderin ulttyq kompaniialardyń, áleýmettik-kásipkerlik korporatsiialardyń, ortalyq memlekettik organdardyń baqylaý keńesterine engizý jónindegi usynysty qoldaimyn. Bul ashyq bolýǵa, sonyń ishinde qoǵamdyq nazardan tys qalǵan kvazimemlekettik sektordyń ashyq bolýyna múmkindik beredi. Ulttyq keńestiń músheleri «Ashyq ákimdik» tájiribesin jappai taratýdy usynyp otyr. Shyn máninde, bizge basqarý mádenietiniń jańa standartyna kóshý kerek. «Ashyq ákimdik» jergilikti biliktiń qoǵam úshin qoljetimdi bolýyna múmkindik beredi, halyq pen memlekettik qyzmetshiler arasyndaǵy kedergini alyp tastaidy, – dedi Memleket basshysy.
Prezident saiasi júieni jańǵyrtýdy jáne kiristerdiń ádil bólinýin qamtamasyz etýi tiis áleýmettik saiasatty qaita qaraý isin jalǵastyrý qajettigin aitty. Sonymen qatar Qasym-Jomart Toqaev Ulttyq keńestiń jumys tobynyń aiasynda Qazaqstan halqyna arnalǵan Joldaýda aitylǵan bastamalardy egjei-tegjeili pysyqtaýdy usyndy.
Jiynda Ulttyq keńestiń músheleri – Rahym Oshaqbaev, Muhtar Taijan, Aidos Sarym, Asylbek Qojahmetov, Qazybek Isa, Saiasat Nurbek, Aiman Omarova, Ermek Tursynov, Seidahmet Quttyqadam, Oraz Jandosov sóz sóiledi.
