Qazaqstan Prezidentiniń Aqmola oblysyna jumys sapary reseilik «Rostselmash» kompaniiasymen aradaǵy yntymaqtastyq aiasynda VECTOR410KZ jáne ACROS astyq jinaý kombaindaryn qurastyratyn «KazRost Engineering Ltd.» kásipornynyń jumysymen tanysýdan bastaldy.
Memleket basshysy aýyl sharýashylyǵy tehnikalary men traktorlar qurastyratyn tsehty aralap kórdi, dep habarlaidy "Ult aqparat" Aqordanyń resmi saityna silteme jasap.
Kompaniia direktory Qairat Qalmanbaevtyń aitýynsha, byltyr 29,5 milliard teńgege 504 kombain shyǵarylǵan. Biyl jyl sońyna deiin 598 kombain jáne YTO markaly 300 dóńgelekti traktordyń tórt túrin shyǵarý josparlanyp otyr. Qazirgi tańda kásiporynda 162 adam eńbek etedi.
Memleket basshysy kompaniianyń shyǵaryp jatqan ónimi Qazaqstannyń soltústik óńirindegi tyń jerler úshin mańyzdy ekenin atap ótti.
– Aýyl sharýashylyǵy mashinalaryn jasaý biz úshin basym baǵyt sanalady. Úkimet aýyl sharýashylyǵy máselelerimen ainalysýy qajet. Álemde ne bolyp jatqanyn kórip otyrsyzdar. Azyq-túliktiń baǵasy 40 paiyzǵa qymbattady. Biz elimizdegi baǵany ustap turýǵa tyrysamyz. Biraq bul ońai emes. Atalǵan máselelerdi sheshemiz. Árine, Qazaqstan aýyl sharýashylyǵy damyǵan el bolýy tiis. Biz is júzinde ózimizdi aýyl sharýashylyǵy ónimderimen tolyq qamtamasyz etýge kóshýimiz kerek. Qazir iri kompaniialarmen jáne investorlarmen jumys istep jatyrmyz, – dedi Prezident.
