Memleket basshysy Qasym-Jomart Toqaev qoǵamnyń eńbekkerlerge degen kózqarasyn túpkilikti ózgertý kerektigin málim etti, dep habarlaidy "Ult aqparat".
«Álem jurtshylyǵy qazaq halqyn kóńili darqan, ǵalamdyq qubylystardy óziniń qalyptasqan filosofiialyq kózqarasy arqyly qabyldai alatyn ult retinde tanyp, biledi. Shydamdylyq pen janashyrlyq – qanymyzda bar qasiet. Osynaý Uly dalaǵa eń alǵash tabany tigen saiahatshylar aldymen bizdiń osy erekshelikterimizdi basa aitqan. Sonymen qatar biz Abaidyń óshpes týyndysy – «Qara sózderde» aitylǵan óz kemshilikterimizdi de jaqsy bilemiz. Aitpaqshy, osy arada Murat Áýezovtiń «Qara sózderge» «Ǵaqliiat» degen ekinshi ataý bereiik degen usynysyn qoldaitynymdy aita keteiin», - dedi Prezident respýblikalyq «Ana tili» basylymyna bergen suhbatynda.
Memleket basshysy qoǵamnyń eńbekkerlerge degen kózqarasyn ózgertý mańyzdylyǵyna toqtaldy.
«Ókinishke qarai, keibir jaǵdaida bizdiń eńbekke bailanysty qarym-qatynasymyzǵa syni kózqaraspen qaraityndar az emes. Bul jaǵdai meniń kóńilime qaiaý salady. Biz qoǵamnyń eńbekkerlerge degen kózqarasyn túpkilikti ózgertýimiz kerek. Árbir eńbek qurmetke laiyq bolýy qajet. Sondyqtan men «Halyq alǵysy» degen memlekettik nagrada taǵaiyndadym. Al eńbektegi tabysy úshin beriletin «Eńbek Dańqy» ordeniniń mártebesin kóterý jóninde sheshim qabyldadym», - deidi Qasym-Jomart Toqaev.
Prezident byltyr Aqordaǵa mekemeler men aýyldardaǵy qarapaiym jumysshylardy arnaiy shaqyryp, marapattaǵanyn da eske aldy.
«Biz osyndai eńbek adamdaryna degen qurmetti arttyryp, el súisinip qaraityndai jaǵdai jasaýymyz qajet. Sol arqyly óskeleń urpaq qoǵamnyń qurmetine bólený úshin joǵary memlekettik laýazymdardy ielenbei-aq, óz isin tyńǵylyqty, muqiiat atqarsa jetkilikti ekenin túsinýge tiis. Úkimet meniń tapsyrmam boiynsha Jumyspen qamtýdyń jol kartasyn ázirledi. Ony iske asyrý úshin shamamen 1 trillion teńgege deiin qarjy jumsalady. Jaqynda men Úkimettiń ýaqytsha jumys oryndaryn ashýǵa ǵana áýes bolyp, turaqty jumys oryndaryn kóptep ashýdy nazardan shyǵaryp alǵanyn synǵa aldym. Búginde bizdiń elde 2 millionǵa jýyq adam ózin-ózi jumyspen qamtyp otyr. Jumyssyzdar sany da kóp», - dedi ol.
Qasym-Jomart Toqaev bul – óte kúrdeli áleýmettik másele ekenin, ony shuǵyl sheshpese bolmaitynyn jetkizdi.
«Eńbekke baýlý ideologiiasy ataqty aqyn-jazýshylarymyzdyń shyǵarmashylyǵynda barynsha kórinis taýyp, aldyńǵy qatarda nasihattalýy kerek dep sanaimyn. Qazir «Toiyń toiǵa ulassyn» dep ándetip, toi toilap júretin ýaqyt emes. Búgingidei tehnologiianyń zamanynda toi-tomalaqtyń áńgimesin aityp, bir-birin asyra maqtap, as iship, aiaq bosatqanǵa riza keiipte júrý ádetinen arylý kerek. Tipti osyndai qaýipti pandemiia kezinde keibir azamattarymyz maǵan hat jazyp, toi ótkizýge múmkindik berý kerek dep talap qoiady. Memlekettiń ózi ólermendikpen ómir súretin kezge keldik. Sondyqtan eńbek etý – ómir súrý saltyna ainalyp, basty mindet sanalýǵa tiis. Toi qýalaityn emes, oi qýalaityn kezeńmen betpe-bet keldik. Bul dáýir – aqyl-oidyń, ǵylym men bilimniń, eńbektiń dáýiri!» - deidi Qasym-Jomart Toqaev.
