مەملەكەت باسشىسى قاسىم-جومارت توقاەۆ قوعامنىڭ ەڭبەككەرلەرگە دەگەن كٶزقاراسىن تٷپكٸلٸكتٸ ٶزگەرتۋ كەرەكتٸگٸن مەلٸم ەتتٸ, دەپ حابارلايدى "ۇلت اقپارات".
«ەلەم جۇرتشىلىعى قازاق حالقىن كٶڭٸلٸ دارقان, عالامدىق قۇبىلىستاردى ٶزٸنٸڭ قالىپتاسقان فيلوسوفييالىق كٶزقاراسى ارقىلى قابىلداي الاتىن ۇلت رەتٸندە تانىپ, بٸلەدٸ. شىدامدىلىق پەن جاناشىرلىق – قانىمىزدا بار قاسيەت. وسىناۋ ۇلى دالاعا ەڭ العاش تابانى تيگەن ساياحاتشىلار الدىمەن بٸزدٸڭ وسى ەرەكشەلٸكتەرٸمٸزدٸ باسا ايتقان. سونىمەن قاتار بٸز ابايدىڭ ٶشپەس تۋىندىسى – «قارا سٶزدەردە» ايتىلعان ٶز كەمشٸلٸكتەرٸمٸزدٸ دە جاقسى بٸلەمٸز. ايتپاقشى, وسى ارادا مۇرات ەۋەزوۆتٸڭ «قارا سٶزدەرگە» «عاقلييات» دەگەن ەكٸنشٸ اتاۋ بەرەيٸك دەگەن ۇسىنىسىن قولدايتىنىمدى ايتا كەتەيٸن», - دەدٸ پرەزيدەنت رەسپۋبليكالىق «انا تٸلٸ» باسىلىمىنا بەرگەن سۇحباتىندا.
مەملەكەت باسشىسى قوعامنىڭ ەڭبەككەرلەرگە دەگەن كٶزقاراسىن ٶزگەرتۋ ماڭىزدىلىعىنا توقتالدى.
«ٶكٸنٸشكە قاراي, كەيبٸر جاعدايدا بٸزدٸڭ ەڭبەككە بايلانىستى قارىم-قاتىناسىمىزعا سىني كٶزقاراسپەن قارايتىندار از ەمەس. بۇل جاعداي مەنٸڭ كٶڭٸلٸمە قاياۋ سالادى. بٸز قوعامنىڭ ەڭبەككەرلەرگە دەگەن كٶزقاراسىن تٷپكٸلٸكتٸ ٶزگەرتۋٸمٸز كەرەك. ەربٸر ەڭبەك قۇرمەتكە لايىق بولۋى قاجەت. سوندىقتان مەن «حالىق العىسى» دەگەن مەملەكەتتٸك ناگرادا تاعايىندادىم. ال ەڭبەكتەگٸ تابىسى ٷشٸن بەرٸلەتٸن «ەڭبەك داڭقى» وردەنٸنٸڭ مەرتەبەسٸن كٶتەرۋ جٶنٸندە شەشٸم قابىلدادىم», - دەيدٸ قاسىم-جومارت توقاەۆ.
پرەزيدەنت بىلتىر اقورداعا مەكەمەلەر مەن اۋىلدارداعى قاراپايىم جۇمىسشىلاردى ارنايى شاقىرىپ, ماراپاتتاعانىن دا ەسكە الدى.
«بٸز وسىنداي ەڭبەك ادامدارىنا دەگەن قۇرمەتتٸ ارتتىرىپ, ەل سٷيسٸنٸپ قارايتىنداي جاعداي جاساۋىمىز قاجەت. سول ارقىلى ٶسكەلەڭ ۇرپاق قوعامنىڭ قۇرمەتٸنە بٶلەنۋ ٷشٸن جوعارى مەملەكەتتٸك لاۋازىمداردى يەلەنبەي-اق, ٶز ٸسٸن تىڭعىلىقتى, مۇقييات اتقارسا جەتكٸلٸكتٸ ەكەنٸن تٷسٸنۋگە تيٸس. ٷكٸمەت مەنٸڭ تاپسىرمام بويىنشا جۇمىسپەن قامتۋدىڭ جول كارتاسىن ەزٸرلەدٸ. ونى ٸسكە اسىرۋ ٷشٸن شامامەن 1 تريلليون تەڭگەگە دەيٸن قارجى جۇمسالادى. جاقىندا مەن ٷكٸمەتتٸڭ ۋاقىتشا جۇمىس ورىندارىن اشۋعا عانا ەۋەس بولىپ, تۇراقتى جۇمىس ورىندارىن كٶپتەپ اشۋدى نازاردان شىعارىپ العانىن سىنعا الدىم. بٷگٸندە بٸزدٸڭ ەلدە 2 ميلليونعا جۋىق ادام ٶزٸن-ٶزٸ جۇمىسپەن قامتىپ وتىر. جۇمىسسىزدار سانى دا كٶپ», - دەدٸ ول.
قاسىم-جومارت توقاەۆ بۇل – ٶتە كٷردەلٸ ەلەۋمەتتٸك مەسەلە ەكەنٸن, ونى شۇعىل شەشپەسە بولمايتىنىن جەتكٸزدٸ.
«ەڭبەككە باۋلۋ يدەولوگيياسى اتاقتى اقىن-جازۋشىلارىمىزدىڭ شىعارماشىلىعىندا بارىنشا كٶرٸنٸس تاۋىپ, الدىڭعى قاتاردا ناسيحاتتالۋى كەرەك دەپ سانايمىن. قازٸر «تويىڭ تويعا ۇلاسسىن» دەپ ەندەتٸپ, توي تويلاپ جٷرەتٸن ۋاقىت ەمەس. بٷگٸنگٸدەي تەحنولوگييانىڭ زامانىندا توي-تومالاقتىڭ ەڭگٸمەسٸن ايتىپ, بٸر-بٸرٸن اسىرا ماقتاپ, اس ٸشٸپ, اياق بوساتقانعا ريزا كەيٸپتە جٷرۋ ەدەتٸنەن ارىلۋ كەرەك. تٸپتٸ وسىنداي قاۋٸپتٸ پاندەمييا كەزٸندە كەيبٸر ازاماتتارىمىز ماعان حات جازىپ, توي ٶتكٸزۋگە مٷمكٸندٸك بەرۋ كەرەك دەپ تالاپ قويادى. مەملەكەتتٸڭ ٶزٸ ٶلەرمەندٸكپەن ٶمٸر سٷرەتٸن كەزگە كەلدٸك. سوندىقتان ەڭبەك ەتۋ – ٶمٸر سٷرۋ سالتىنا اينالىپ, باستى مٸندەت سانالۋعا تيٸس. توي قۋالايتىن ەمەس, وي قۋالايتىن كەزەڭمەن بەتپە-بەت كەلدٸك. بۇل دەۋٸر – اقىل-ويدىڭ, عىلىم مەن بٸلٸمنٸڭ, ەڭبەكتٸڭ دەۋٸرٸ!» - دەيدٸ قاسىم-جومارت توقاەۆ.
