Foto: Aqorda
Qasym-Jomart Toqaev Serdjo Mattarellanyń Qazaqstanǵa sapary eki el arasyndaǵy yntymaqtastyqty odan ári nyǵaitýǵa tyń serpin beretinin atap ótti, dep habarlaidy Ult.kz.
Prezidenttiń aitýynsha, bul sapar Qazaqstan men Italiia arasyndaǵy dostyq pen burynnan kele jatqan seriktestikti rastaidy.
– Prezident myrza, Sizdi mártebeli meiman retinde qarsy alǵanyma qýanyshtymyn. Qazaqstanǵa jasaǵan alǵashqy saparyńyz yntymaqtastyǵymyzdyń jańa paraǵyn ashatyny sózsiz. Qazaqstan men Italiia arasynda tyǵyz yqpaldastyq ornaǵan. Sizdiń elińizge qurmetimiz erekshe. Ózara saýda dáiekti túrde damýda. Bizdiń ekonomikalyq bailanystarymyzdyń negizi berik. Túrli saladaǵy qarym-qatynasymyz joǵary nátije kórsetip keledi. Memleket basshysy retinde ekijaqty yqpaldastyqty nyǵaitýǵa úles qosýǵa ázirmin, – dedi Qazaqstan Prezidenti.
Serdjo Mattarella Qasym-Jomart Toqaevqa qonaqjailyq tanytqany úshin alǵys aityp, ózara qarym-qatynasty odan ári arttyrýdyń mańyzyna toqtaldy.
– Sizdiń byltyr qańtar aiynda Rimge jasaǵan saparyńyzdan keiin Astanada kezdeskenime qýanyshtymyn. Ózińiz atap ótkendei, elderimiz arasyndaǵy qarym-qatynas udaiy nyǵaiyp, tyǵyz ári tabysty sipat aldy. Eki eldiń saýda-ekonomikalyq, mádeni salalardaǵy yntymaqtastyǵy jyldan jylǵa ilgerileýde. Ýniversitetter arasynda seriktestik jolǵa qoiylǵanyn kórip otyrmyz. Dostyq kóńilińizge alǵys aitamyn, – dedi Italiia Prezidenti.
Taraptar ekijaqty qarym-qatynastyń negizgi baǵyttary, sondai-aq óńirlik jáne halyqaralyq kún tártibindegi ózekti máseleler týraly pikir almasty.
Qasym-Jomart Toqaev oraily sátti paidalanyp, Italiia Premer-ministri Djordja Melonige sálemi men yqylasyn joldady.
