Qurmetti otandastar!
Búgin, 31 mamyr – el tarihyndaǵy eń azaly kezeńniń birin eske alý kúni.
Ótken ǵasyrdyń alǵashqy jartysyndaǵy saiasi qýǵyn-súrgin Keńes Odaǵy dáýirindegi milliondaǵan azamattyń taǵdyryna tańba saldy. Qazaqstanda júz myńnan astam adam jazyqsyz sottalyp, onyń tórtten biri ólim jazasyna kesildi.
Elimizdiń aýmaǵynda on bir eńbekpen túzeý lageri boldy. Qazaqstan Respýblikasynyń Tuńǵysh Prezidenti Nursultan Nazarbaevtyń bastamasymen qasiret mekeni KARLAG pen ALJIR-de totalitarlyq júieniń sheksiz qatigezdigin únemi eske salyp turatyn tarihi memorialdy keshender ashyldy.
Zulmat zamanda tutas halyqtar qýdalaýǵa tústi. Týǵan jerinen zorlyqpen kóshirilgen bes millionǵa jýyq adam qasietti qazaq jerinen pana tapty. Qazaqstan olardyń qutty mekenine ainaldy.
Ultymyz alapat ashtyqtyń zardabyn tartyp, orny tolmas shyǵynǵa ushyrady. Shekten shyqqan ujymdastyrý naýqany Uly dalany buryn-sońdy bolmaǵan aýqymdy gýmanitarlyq apatqa uryndyrdy.
Halqymyz nebir zobalańdy kórse de rýhyn alasartqan joq. Birligin bekemdep, yntymaǵyn arttyra tústi.
Táýelsizdik tańy atqannan keiin biz arystarymyzdy aqtaýǵa kiristik. Kezinde jazyqsyz jazalanǵan myńdaǵan azamattyń esimin el jadynda jańǵyrttyq.
Byltyr qýǵyn-súrgin qurbandaryn tolyq aqtaý úshin Memlekettik komissiia quryldy. Komissiia solaqai saiasattan japa shekken qazaqstandyqtarǵa qatysty tarihi ádildikti qalpyna keltirýge tiis. Bul – memlekettiń ǵana mindeti emes, búkil qoǵamnyń paryzy.
Tól shejiremizdegi qaiǵyly kezeńderdi ulttyq biregeiligimizden bóle-jara qaraý múmkin emes. Sondyqtan, biz saiasi qýǵyn-súrgin jáne asharshylyq qurbandarynyń rýhyna taǵzym etip, esimderin máńgi este saqtaimyz.
Tarihtan taǵylym alyp, mundai taýqymet eshqashan qaitalanbaýy úshin bárin jasaityn bolamyz.
