Foto: Aqorda
Memleket basshysy Qasym-Jomart Toqaev Qazaqstan halqyn Táýelsizdik kúnimen quttyqtady. Bul týraly Aqordanyń baspasóz qyzmeti jariialady.
— Qurmetti otandastar! Táýelsizdik kúni qutty bolsyn!
Bul merekeniń elimiz úshin mán-mańyzy airyqsha. Osy kúni halqymyz Qazaqstandy egemen el retinde damytý jolynda erikti ári túpkilikti tańdaý jasady.
Táýelsizdik bárinen qymbat! Biz babalar rýhyna taǵzym etip, óskeleń urpaq aldyndaǵy tarihi jaýapkershilikti sezine otyryp, osy ustanymǵa adal bolamyz.
Azamattarymyzdyń yrysty yntymaǵynyń, ózara qoldaýynyń jáne jasampaz eńbeginiń, sondai-aq qoǵamdaǵy turaqtylyq pen kelisimniń arqasynda Qazaqstan Táýelsizdikti nyǵaitý isinde eleýli jetistikterge qol jetkizdi. Qazir búkil álem jyldam ózgerip jatyr. Túrli synaqtarmen qatar, tyń múmkindikterge toly jańa tarihi dáýir bastaldy.
Mundai jaǵdaida biz jas jáne ozyq oily ult retinde bolashaqqa zor úmitpen jáne nyq senimmen qarap, berekeli birligimizdi saqtaýymyz kerek. Elimizdiń jahandyq deńgeidegi bedeli men básekege qabiletin arttyryp, Qazaqstandy kórkeigen memleket retinde damytý úshin aianbai eńbek etýimiz qajet.
Qazir júzege asyrylyp jatqan aýqymdy reformalardyń nátijesinde zor tabysqa jetemiz dep senemin. Jan-jaqty jańǵyrýǵa baǵyttalǵan strategiialyq baǵdarymyzdan aýytqymai, Ádiletti, Kúshti, Taza, Qaýipsiz Qazaqstandy quramyz.
Barshańyzǵa mol baqyt, baq-bereke jáne tolaǵai tabys tileimin!
Qasterli Táýelsizdigimiz máńgi bolsyn, — delingen Memleket basshysynyń quttyqtaýynda.
