Memleket basshysy, QR Qarýly Kúshteriniń Joǵarǵy Bas qolbasshysy Qasym-Jomart Toqaev qazaqstandyqtardy Otan qorǵaýshy kúnimen quttyqtady, - dep habarlaidy Aqorda.
***
Qurmetti otandastar!
Barshańyzdy Otan qorǵaýshy kúnimen quttyqtaimyn!
Aibyndy armiiamyzdyń dańqty dástúri keń-baitaq jerimizdi janqiiarlyqpen qorǵap qalǵan batyr babalarymyz ben Uly Otan soǵysy ardagerleriniń óshpes erliginen bastaý alady. Búginde áskerimiz Táýelsiz Qazaqstannyń berik qalqany retinde jaýyngerlik sheberlik pen asqaq rýhtyń ozyq úlgisin kórsetip keledi.
Bul merekede biz óz ómirin Otan qorǵaýǵa arnaǵan, antyna adal jandarǵa erekshe qurmet kórsetemiz. Memlekettik shekaramyz ben áýe keńistigimizdi kúzetip, armiia jáne flot bólimshelerinde áskeri boryshyn ótep jatqan barlyq sarbazǵa shynaiy rizashylyǵymdy bildiremin.
Koronavirýs indetimen kúrestiń aldyńǵy shebinde júrgen áskeri qyzmetshiler, sonyń ishinde arnaýly jiyndarǵa shaqyrylǵan azamattar da alǵysqa laiyq. Olardyń eren eńbegi – shynaiy patriotizm men elge qyzmet etýdiń jarqyn kórinisi.
Memleketimizdiń qorǵanys áleýetin kúsheitý, áskeri qyzmetshilerdiń ózderin jáne otbasyn qoldaý basty mindetimiz bolyp qala beredi.
Sizderge zor densaýlyq, baq-bereke jáne eldik múdde jolyndaǵy abyroily ári mártebeli qyzmetterińizge tolaiym tabys tileimin!
