Parlament palatalarynyń birlesken otyrysynda Memleket basshysy Qasym-Jomart Toqaev Konstitýtsiialyq Keńes músheleriniń, Joǵarǵy Sot sýdialarynyń, Qazaqstan Respýblikasynyń Tuńǵysh Prezidenti – Elbasynyń, Úkimet músheleriniń qatysýymen Qazaqstan halqyna ant berdi, - dep habarlaidy "Ult aqparat".
Osy sátten bastap ol Prezident qyzmetine resmi túrde kirisken bolyp sanalady.
Qazaqstan Respýblikasynyń Týy men Konstitýtsiiasy birlesken otyrys ótetin zalǵa saltanatty túrde jetkizildi. Zalǵa jinalǵandar Qazaqstan Respýblikasynyń Tuńǵysh Prezidenti Nursultan Nazarbaevty dý qol shapalaqpen qarsy aldy.
Qazaqstan Konstitýtsiialyq keńesiniń tóraǵasy Qairat Mámi Kontitýtsiianyń 42-babyna sáikes Prezident ókilettigi qalǵan merzimge Senat tóraǵasy Qasym-Jomart Toqaevqa kóshetinin málimdedi. Osydan keiin Senat tóraǵasy Qasym-Jomart Toqaev Konstitýtsiiaǵa qolyn qoiyp, saltanatty túrde el halqyna ant berdi.
«Qazaqstan halqyna adal qyzmet etýge, Qazaqstan Respýblikasynyń Konstitýtsiiasy men zańdaryn qatań saqtaýǵa, azamattardyń quqyqtary men bostandyqtaryna kepildik berýge, Qazaqstan Respýblikasy Prezidentiniń ózime júktelgen mártebeli mindetin adal atqarýǵa saltanatty túrde ant etemin», - dedi Qasym-Jomart Toqaev.
Sondai-aq, Respýblika Prezidenti ókilettigin ýaqytsha atqaratyn Qasym-Jomart Toqaevqa Prezident kýáligi, omyraýǵa taǵatyn belgisi jáne bairaǵy, «Altyn qyran» ordeni tapsyryldy.
«QR Konstitýtsiiasynyń 48-babyna sáikes, Sizge Prezident kýáligin, omyraýǵa taǵatyn belgisin jáne bairaǵyn, «Altyn qyran» ordenin tapsyrýǵa ruqsat etińiz», - dedi QR Parlamenti palatalarynyń birlesken otyrysynda Qazaqstan Respýblikasy Ortalyq sailaý komissiiasynyń tóraǵasy Berik Imashev.
Sodan keiin Qasym-Jomart Toqaev Qazaqstan prezidenti retinde alǵashqy sózin sóiledi.
"Asa qadirli Elbasy, qurmetti Parlament depýtattary, Úkimet músheleri, qurmetti otandastar! Keshe naýryzdyń 19 naýryz barsha álem jurtshylyǵy asa mańyzdy tarihi oqiǵaǵa kýá boldy. Qazaq memlekettiliginiń negizin qalaýshy, uly tulǵa, Qazaqstannyń tuńǵysh prezidenti Nursultan Nazarbaev óz erkimen memleket basshysy ókilettigin tapsyrdy. Elbasynyń bul jigerli sheshimi onyń jahandyq deńgeidegi jáne tarihi aýqymdaǵy saiasi qairatker retinde ulylyǵyn kórsetti", - dedi Toqaev.
Ol Qazaqstannyń jetistikteri tuńǵysh prezident Nursultan Nazarbaevtyń qajyrly eńbeginiń arqasynda múmkin bolǵanyn aitty.
"Elbasy Keńes odaǵynyń kúiregen qaldyqtarynan qalǵan asa kúrdeli geosaiai jaǵdaida jańa memlekettiń irgesin qalady jáne onyń kóshin bastady. Kóptegen teris boljamdarǵa qaramastan, memleketti barsha álem moiyndaǵan tabystarǵa jetkizdi. Dúniejúzi kartasynda qarqyndy damý, demokratiia, kelisim men beibit ómirdiń shynaiy simvolyna ainalǵan memleket paida boldy", - dedi jańa prezident.
Aita keteiik, birlesken otyrysqa QR Tuńǵysh Prezidenti - Elbasy Nursultan Nazarbaev, Úkimet músheleri, Prezidentke tikelei baǵynatyn jáne esep beretin memlekettik organdardyń basshylary, Qazaqstanda tirkelgen sheteldik missiialardyń basshylary, Senat depýtattary, Májilis depýtattary qatysty.
Qasym-Jomart Kemeluly 1953 jyly týǵan. Máskeý memlekettik halyqaralyq qatynastar institýtyn, Beijiń lingvistikalyq institýtyn (QHR), Resei Federatsiiasy Syrtqy ister ministrliginiń Diplomatiialyq akademiiasyn bitirgen. QR Premer-Ministri, Memlekettik hatshy, Syrtqy ister ministri, Úshinshi, tórtinshi sailanymdaǵy QR Parlamenti Senatynyń Tóraǵasy, BUU Bas hatshysynyń orynbasary, BUU-nyń Jenevadaǵy bólimshesiniń Bas direktory, Qarýsyzdandyrý konferentsiiasynyń Bas hatshysy qyzmetterin atqarǵan. 2013 jylǵy 16 qazanda QR Prezidentiniń Jarlyǵymen Parlament Senatynyń depýtattyǵyna taǵaiyndalyp, Senat Tóraǵasy bolyp sailandy.
2017 jylǵy 14 qyrkúiekte QR Parlamenti Senatynyń otyrysynda Prezidenttiń usynysy boiynsha jasyryn daýys berý arqyly Qasym-Jomart Kemeluly Toqaev Senattyń Tóraǵasy bolyp qaitadan sailandy.
