Foto: Aqorda
Memleket basshysy búgingi basqosýdyń tarihi mán-mańyzy airyqsha ekenin atap ótip, Qazaqstan halqy Assambleiasynyń 30 jyldyq mereitoiymen quttyqtady, dep habarlaidy Ult.kz.
"Bul – búkil Qazaqstan úshin aitýly oqiǵa. Osy ýaqyt ishinde Assambleia qoǵamdaǵy turaqtylyq pen kelisimdi nyǵaitýǵa ólsheýsiz úles qosty. Elimizdegi birlik pen teńdiktiń, turaqtylyq pen tynyshtyqtyń simvolyna ainaldy. Etnosaralyq qatynas salasyndaǵy teńdessiz qoǵamdyq institýt retinde tanyldy. Sonyń arqasynda Qazaqstanda beibitshilik pen kelisimniń qaitalanbas úlgisi qalyptasty", - dep atap ótti prezident.
Aitýynsha, 1995 jyly Qazaqstannyń tuńǵysh Prezidenti Nursultan Nazarbaevtyń bastamasymen qurylǵan uiym qazaq memlekettiligi qalyptasyp jatqan qiyn kezeńde tereń saiasi mánge ie boldy.
"Senattyń bes depýtatyn Assambleia keńesiniń usynysymen Prezident taǵaiyndaidy. Bul qadam zańnamalyq deńgeide barlyq etnostyń múddesin qorǵaý múmkindigin edáýir arttyrdy. Oǵan qosa, Qazaqstan parlamentarizmi tarihynda alǵash ret «Bir el – bir múdde» atty palataaralyq depýtattar toby quryldy. Bul top qoǵamdyq kelisimdi nyǵaitý máselelerimen ainalysady. Qazir memlekettik organdar túgel Assambleia jumysyna atsalysady. Ministrlikterden, oblys ákimdikteri men barlyq deńgeidegi máslihattardan bastap aýyl ákimdikterine deiin odan shet qalmaidy", - dedi Qasym-Jomart Toqaev.
Memleket basshysy Assambleia qoǵamdyq uiymdarmen jáne institýttarmen tyǵyz bailanysta jumys istep, elimizdiń ishki saiasatyn júzege asyrýǵa belsene atsalysyp kele jatqanyn aitty. Osylaisha, memleket pen qoǵam arasynda syndarly ári jemisti dialog ornatýǵa yqpal etýde.
"Etnosaralyq túsinispeýshilikterdiń aldyn alýda mańyzdy ról atqaratyn QHA-nyń etnomediatsiia institýtyna toqtalǵym keledi. Sońǵy ýaqytta Assambleia qyzmetindegi sarapshylyq quramnyń sapasy jańa deńgeige kóterildi. Ǵylymi-sarapshylar keńesi men 42 Assambleia kafedrasy ult qurylymy men etnosaralyq qarym-qatynastar úderisin zertteitin 360-tan astam sarapshyny biriktirip otyr", - dedi Memleket basshysy.
