Qasym-Jomart Toqaev Qazaqstanǵa resmi saparmen kelgen Qatar memleketi Premer-Ministriniń orynbasary – Syrtqy ister ministri sheih Muhammed ben Abdýlrahman Ál Tánidi qabyldady.
Bul týraly Aqordanyń resmi saity habarlady.
Kezdesý barysynda qazaq-qatar qatynastarynyń damý perspektivalary talqylandy. Bul rette saiasi, saýda-ekonomikalyq jáne investitsiialyq bailanystardy nyǵaitýǵa basa mán berildi.
Qazaqstan Prezidenti ózara qyzyǵýshylyq tanytatyn salalar boiynsha eki el arasyndaǵy qarym-qatynastardy nyǵaitý úshin zor múmkindik bar ekenin aitty.
– Sizdiń bul saparyńyzdyń mańyzy óte zor bolady dep oilaimyn. Keleshekte biz ózara yntymaqtastyq baǵytynda úlken nátijelerge qol jetkize alatynymyzǵa senimdimin. Qazaqstan osyndai jetistikterge qol jetkizýge múddeli, – dedi Memleket basshysy.
Prezident Qasym-Jomart Toqaev Qatar Ámiri sheih Tamim ben Hamad Ál Tanimen jýyrda telefon arqyly sóilesken kezde qol jetkizilgen ýaǵdalastyq týraly aitty. Atap aitqanda taraptar Qatar basshysynyń Qazaqstanǵa josparlanǵan saparynyń qarsańynda birneshe iri investitsiialyq jobalardy birlese ázirleý jóninde kelisimge kelgen.
Óz kezeginde, Qatar Premer-Ministriniń orynbasary – Syrtqy ister ministri Qatar Ámiriniń Qazaqstan Prezidentine jáne halqyna joldaǵan sálemi men izgi tilegin jetkizdi.
Sheih Muhammed ben Abdýlrahman Ál Tani Qasym-Jomart Toqaevqa Qatar Ámiriniń ekonomika salasyna basa mán bere otyryp, Qazaqstanmen aradaǵy yqpaldastyqty odan ári nyǵaitý úshin berik negiz qalaýǵa múddeli ekenin bildirdi. Sondai-aq koronavirýs indetine qarsy qazaqstandyq QazVac vaktsinasynyń ázirlenýine bailanysty Qatar basshysynyń quttyqtaýyn jetkizip, atalǵan másele boiynsha kez kelgen kómek kórsetýge daiyn ekenin atap ótti.
Budan bólek Qatardyń syrtqy saiasi vedomstvosynyń basshysy Qazaqstan Prezidenti Qasym-Jomart Toqaevqa Syrtqy ister ministri Muhtar Tileýberdimen ótkizgen kelissóz nátijeleri jóninde, sondai-aq, Qazaqstan tarapynan investitsiialyq jobalardy iske asyrýǵa bailanysty birqatar usynys túskeni týraly málimet berdi. Bul rette Qatardyń Ulttyq ál-aýqat qory men ulttyq kompaniialary atalǵan jobalardy zertteý boiynsha belsendi jumys júrgizip otyrǵanyn atap ótti.
