Foto: Aqorda
Memleket basshysy Qazaqstanǵa resmi saparmen kelgen Italiia Premer-ministri Djordja Melonidi elorda áýejaiynan qarsy aldy, dep habarlaidy Ult.kz.
Eki el basshysy elorda áýejaiynda az-kem áńgimelesti.
"Sizdi Qazaqstanda qarsy alý – biz úshin úlken mártebe. Aldaǵy kelissózder ekijaqty qarym-qatynastarymyzǵa tyń serpin berýde mańyzdy, tipti, sheshýshi ról atqaratynyna senimdimin. Italiia – Qazaqstannyń Eýropadaǵy jetekshi saýda seriktesteriniń biri. Kesheli-búgin Astanada Italiia biznesiniń kóptegen ókiliniń qatysýymen biznes-forým ótti. Eki el arasyndaǵy iskerlik bailanystardy damytýǵa qosqan úlesińizdi joǵary baǵalaimyz", - dedi Qasym-Jomart Toqaev.
Óz kezeginde Djordja Meloni Qazaqstanǵa alǵash kelip otyrǵanyn jetkizdi.
"Sizdiń elińizge alǵash ret kelip otyrmyn. Óte qýanyshtymyn. Ózińiz aitqandai, eki eldiń qarym-qatynasy óte jaqsy. Alaida budan da joǵary nátijege qol jetkizýge árdaiym múmkindik bar. Biz Qazaqstandy Italiianyń, sondai-aq Eýropanyń mańyzdy seriktesi retinde qarastyramyz. Sonymen qatar qazirgi kezde Ortalyq Aziia óńiri strategiialyq mánge ie boldy. Memleketter basshylary deńgeiinde birinshi «Italiia – Ortalyq Aziia» sammitin uiymdastyrǵanyńyz úshin Sizge rizashylyǵymdy bildiremin. Bul basqosý aimaqpen qarym-qatynasymyzdaǵy tarihi sát bolady dep oilaimyn. Qazirgi syndarly kezeńde biz úshin barlyq deńgeide yntymaqtastyq ornatý óte ózekti", - dedi Italiia Premer-ministri.
