Qasym-Jomart Toqaev Tájikstan Respýblikasynyń Prezidenti Emomali Rahmonmen kezdesti, dep habarlaidy "Ult aqparat" Aqordaǵa silteme jasap.
Qasym-Jomart Toqaev Nur-Sultan men Dýshanbe arasyndaǵy baiyrǵy dostyq qatynastar men yntymaqtastyqty atap ótip, Qazaqstannyń sailanǵan Prezidenti retindegi alǵashqy sheteldik saparynyń simvoldyq máni bar ekenin aitty.
– Aziiadaǵy ózara is-qimyl jáne senim sharalary keńesiniń sammitine keler bolsaq, Siz osy forýmnyń basynda turdyńyz jáne onyń bastamashylarynyń biri boldyńyz. Tuńǵysh Prezidentimiz – Elbasy Nursultan Ábishuly Nazarbaev 1992 jyly Birikken Ulttar Uiymynyń minberinen osyndai usynys jasaǵan bolatyn. Sol bastama qoldaý taýyp, sodan beri bul úderis tabysty damyp keledi. Sizdiń osy uiymnyń damýyna zor úles qosqanyńyzdy taǵy da atap ótkim keledi. Al, qazir, is júzinde osy jiyndy basqaryp otyrsyz, – dedi Memleket basshysy.
Qasym-Jomart Toqaev Qazaqstan men Tájikstannyń kópqyrly qurylymdar men halyqaralyq uiymdarda bir-birine qoldaý kórsetip kele jatqanyn aityp, osy yqpaldastyqty jalǵastyra berýge nietti ekenin jetkizdi.
Tájikstan Prezidenti Qasym-Jomart Toqaevqa iltipat bildirip, Qazaqstan Respýblikasynyń Prezidenti bolyp sailanǵannan keiingi birinshi jumys sapary ekenin atap ótti.
– Eń aldymen, Sizdi Qazaqstan Respýblikasynyń Prezidenti bolyp sailanýyńyzben quttyqtaimyn. Josparlaryńyz ben bastamalaryńyzdyń tabysty júzege asýyna tilektespin. Sailaý qorytyndysy halqyńyzdyń Qazaqstannyń ishki jáne syrtqy saiasi baǵdaryn júzege asyrý isindegi sabaqtastyqty qoldaitynyn taǵy da dáleldedi, – dedi Emomali Rahmon.
Tájikstan kóshbasshysy Qazaqstanmen yntymaqtastyqtyń óz memleketiniń syrtqy saiasatynda mańyzdy orynǵa ie ekenin atap ótti. Onyń paiymdaýynsha, birlesken kúsh-jigerdiń arqasynda eki el arasyndaǵy strategiialyq áriptestik bolashaqta da jemisti dami beredi.
Kelissózder sońynda taraptar Dýshanbe sammitiniń qatysýshy elder úshin Keńes sammitiniń aralyq jumysynyń qorytyndysyn shyǵarýǵa, aimaqtaǵy turaqtylyq pen qaýipsizdikti qamtamasyz etý máseleleri jóninde pikir almasýǵa jáne bolashaqtaǵy baǵyttary men basymdyqtaryn aiqyndaýǵa múmkindik beretinin atap ótti.
Resmi kezdesýden keiin Emomali Rahmon Qasym-Jomart Toqaevqa óziniń rezidentsiiasy – Ult saraiyn tanystyrdy.
