Memleket basshysy Tuńǵysh Prezident – Elbasy Nursultan Nazarbaevqa arnalǵan monýmenttiń ashylý rásimine qatysty, dep habarlaidy Aqorda.
Qasym-Jomart Toqaev onlain rejimde Ulttyq qorǵanys ýniversitetindegi Qazaqstannyń Tuńǵysh Prezidenti – Elbasy N.Á.Nazarbaevqa arnalǵan monýmenttiń ashylý rásimine qatysty. Prezident óz sózinde Nursultan Nazarbaevtyń qazirgi Qazaqstannyń negizin qalaǵanyn, egemen elimizdiń strategiialyq damý jolyn aiqyndap, halqymyzdy ortaq maqsatqa jumyldyrǵanyn atap ótti.
– Turaqtylyq pen tatýlyq, bereke men birlik – Elbasynyń sarabdal saiasatynyń nátijesi. Kez kelgen memlekettiń tarihynda óshpes iz qaldyrǵan biregei tulǵalar bar. Olardyń sińirgen eńbegin baǵalai bilý jáne jan-jaqty dáripteý – óskeleń urpaqtyń paryzy, – dedi Qasym-Jomart Toqaev.
Memleket basshysynyń aitýynsha, Qazaqstannyń Qarýly Kúshteri Tuńǵysh Prezidenttiń Jarlyǵymen qurylǵandyqtan, bul monýmenttiń Ulttyq qorǵanys ýniversitetinde ornatylýynyń simvoldyq máni zor.
Elbasy elimizdiń qorǵanys qabiletin arttyrýǵa erekshe kóńil bóldi. Memleket eń qiyn kezeńderdiń ózinde de zamanaýi qarý-jaraq alý, otandyq qorǵanys ónerkásibi kesheniniń qýatyn arttyrý, áskeri qyzmetshilerdi baspanamen qamtamasyz etý, jalaqylaryn ýaqytyly berý, joǵary zeinetaqy tóleý mindetterin ońtaily sheshe bildi.
– Táýelsizdik alǵan sátten bastap Nursultan Ábishuly Nazarbaev áskeri áleýetimizdi qalyptastyrý barysynda eń kúrdeli degen máselelerdi sheshýge ózi tikelei aralasty. Onyń basshylyǵymen halqymyz ben elimizdi yqtimal áskeri qaqtyǵystardan qorǵaý maqsatynda armiiamyzdyń perspektivalary men mindetteri, ulttyq qaýipsizdikti qamtamasyz etýdiń basymdyqtary men mehanizmderi aiqyndaldy. Nursultan Nazarbaev Prezident bolǵan jyldary áskeri qurylymnyń zańnamalyq jáne quqyqtyq-normativtik bazasy ázirlendi. Sondai-aq Qarýly Kúshterdiń qurylymy men quramy jasaqtalyp, armiianyń qarýlanýy kezeń-kezeńimen iske asyp, zamanaýi infraqurylym qalyptasty, – dedi Qasym-Jomart Toqaev.
Joǵarǵy Bas qolbasshy áskerimizdiń qansha jerden zamanaýi tehnikalarmen jabdyqtalǵanymen, memlekettiń qaýipsizdigin qamtamasyz etý barysynda armiianyń jeke quramy negizgi faktor bolyp qala beretinin aitty. Sondyqtan Táýelsizdiktiń alǵashqy jyldarynda eń myqty áskeri kadrlar sapaly áskeri bilim berý isin uiymdastyrýǵa jumyldyryldy. Búginde Qazaqstanda orta áskeri oqý oryndarynan bastap halyqaralyq deńgeidegi ýniversitetke deiingi aralyqta kópsatyly bilim júiesi qalyptasty.
– Halqymyzda «El erlerimen eńseli» degen qanatty sóz bar. Shyn máninde, Qarýly Kúshteri qýatty memlekettiń birligi bekem, abyroiy asqaq bolady. Sondyqtan biz armiiamyzdyń básekege qabilettiligin arttyrýǵa qashanda basa mán beremiz. Bul rette bilim men ǵylymnyń alatyn orny erekshe. Ulttyq qorǵanys ýniversiteti aldaǵy ýaqytta da bilikti mamandar daiyndaý isine mol úles qosady dep senemin, – dedi Memleket basshysy.
