Búgin Aqordada otandyq jáne sheteldik BAQ ókilderine suhbat bergen QR Prezidenti Qasym-Jomart Toqaev sailaýdaǵy qarsylastaryna alǵys aitty, dep habarlaidy "Ult aqparat".
"Eń aldymen maǵan daýys bergen Qazaqstan azamattaryna alǵysymdy aitqym keledi. Bul úlken jaýapkershilik. Bul jaýapkershilikti oryndaý men úshin úlken mindet. Bul - halyqtyń senimi. Sailaý joǵary deńgeide, ádil jáne ashyq ótti. Sailaý barysyn myńnan astam halyqaralyq baiqaýshy qadaǵalady. Álemniń 40 elinen kelgen 350-ge jýyq sheteldik jýrnalister dúniejúzine habar taratty.
Bul sailaýdyń ereksheligi - kóp kandidattyń tirkelýi. 7 kandidat sailaýǵa qatysty. Olar óz baǵdarlamasyn jariialaý múmkinshiligine ie boldy. Bul - jai ǵana daýys berý emes, azamattarymyzdyń el bolashaǵyna bei-jai qaramaityndyǵyn kórsetti. Sondyqtan bul sailaý qyzyqty, óte ashyq túrde ótti dep aitýǵa bolady. Olardyń usynystary, pikirleri óte utymdy boldy. Eń paidaly usynystaryn mindetti túrde men óz jumysym barysynda paidalanamyn. Sondyqtan ózge kanidattarǵa, ózge úmitkerlerge alǵysymdy bildirgim keledi.
Sailaýǵa óte kóp adam keldi, eshkim eshkimdi májbúrlegen joq. Bári tabiǵi túrde ótti. Sailaý qorytyndysyna qanaǵattanǵanymdy bildirýge barlyq negiz bar", - dedi Qasym-Jomart Toqaev BAQ ókilderiniń saýalyna orai.
Aita ketsek, Qazaqstanda 9 maýsymda kezekten tys prezident sailaýy ótti. Osy joly memleket basshysy laýazymyna jeti kandidat talasty.
10 maýsymda Ortalyq sailaý komissiiasy prezident sailaýynyń aldyn ala qorytyndysyn jariialady. Nur Otan partiiasy atynan sailaýǵa túsken Qasym-Jomart Toqaev 70,76% daýys jinap, jeńiske jetti.
