Qasym-Jomart Toqaevtyń tóraǵalyǵymen Qazaqstan Respýblikasy Prezidentiniń janyndaǵy Sheteldik investorlar keńesine múshe munai-gaz kompaniialary basshylarynyń jumys kezdesýi video konferentsiia formatynda ótti, dep habarlaidy "Ult aqparat" Aqordanyń baspasóz qyzmetine silteme jasap.
Jiyn barysynda elimizdiń munai-gaz sektoryn damytý jáne onyń investitsiialyq tartymdylyǵyn arttyrý máseleleri qarastyryldy.
Onlain formattaǵy kezdesýge Royal Dutch Shell plc kontserniniń bas atqarýshy direktory Ben van Biorden, Chevron korporatsiiasynyń óndirý máseleleri jónindegi vitse-prezidenti Djeims Djonson, CNPC korporatsiiasynyń vitse-prezidenti Hýan Iýn Chjan, Eni S.p.A kompaniiasynyń upstream biznes jónindegi direktory Gýido Brýsko, ExxonMobil Global Projects kompaniiasynyń prezidenti Nil Daffin, Total E&P kompaniiasynyń Kaspii jáne Ońtústik Eýropa jónindegi vitse-prezidenti Kristin Hili qatysty.
Prezident jiynǵa qatysýshylarǵa iltipat bildirip, munai-gaz salasy Qazaqstanyń damýynda erekshe mańyzdy ról atqaratynyn atap ótti. Qasym-Jomart Toqaevtyń pikirinshe, álemdik saýda men ekonomikanyń birtindep qaita qalpyna kelýiniń arqasynda, biz munai-gaz sektorynyń halyqaralyq deńgeidegi, sondai-aq, el ishindegi jaǵdaiyna zor úmit artyp otyrmyz.
– Sondyqtan biz osy oń dinamikany paidalanyp, uzaq merzimdi perspektivada atalǵan salanyń investitsiialyq tartymdylyǵyn arttyrý jónindegi aldaǵy baǵyt-baǵdarymyzdy aiqyndap alýymyz kerek, – dedi Memleket basshysy.
Qazaqstan Prezidenti Keńestiń 2020 jyldyń qarasha aiynda ótken jumys kezdesýiniń qorytyndylary boiynsha birlesken esebin tyńdap, aitarlyqtai nátijelerge qol jetkizilgenin aitty.
Osy rette Memleket basshysy birqatar mańyzdy málimdeme jasady.
Atap aitqanda, Qasym-Jomart Toqaev iri munai-gaz jobalary boiynsha jasalǵan ýaǵdalastyqtardyń ýaqtyly iske asyrylýyna nazar aýdardy.
Prezident Úkimet pen investorlardyń túsinistikke kelgenin, endi osy kelisimderdi tolyqtai júzege asyrýdy qamtamasyz etýdiń jáne jedel sheshim qabyldaýdyń mańyzdylyǵyn atap ótti.
– Pandemiiaǵa qaramastan Teńiz kenishin keńeitý jobasy kestege sáikes iske asyp jatyr. Qarashyǵanaq ken ornyn keńeitý jobasy boiynsha túpkilikti investitsiialyq sheshimniń qabyldanýy – júieli jumystyń taǵy bir mysaly. Qazirgi ýaqytta biz Qashaǵandy damytýdyń aýqymdy josparynyń qabyldanýyn kútip otyrmyz, – dedi Qasym-Jomart Toqaev.
Sonymen qatar Memleket basshysy Úkimettiń investitsiia tartýdyń jańa tetikteri usynylǵan baiandamasyna, onyń tiptik kelisim-sharttardy jetildirý bóligine basa mán berdi.
Prezident bul usynystardy qoldap, investitsiianyń quqyqtyq turǵydan qorǵalýyn jáne turaqtylyǵyn qamtamasyz etýdi, sondai-aq, qajet jaǵdaida investitsiialyq jeńildikter jasaýǵa tiisti mehanizmderdiń bárin muqiiat pysyqtaý qajettigin aitty.
– Barlyq jobanyń geologiiaǵa, naryqtan shalǵai ornalasýyna, munai túrlerine bailanysty óz erekshelikteri bolǵandyqtan, «birkelki ádisten» qashýymyz kerek. Úkimet jobalardy kúrdeliligi men mańyzdylyǵy boiynsha júielep, olardy retteýdiń jáne qoldaýdyń tiisti tetikterin aiqyndaýy qajet, – dedi Qasym-Jomart Toqaev.
Osyǵan bailanysty Memleket basshysy Úkimetke jumys tobynyń kelesi otyrysyna jetildirilgen tiptik kelisim-sharttyq mehanizm ázirleýdi tapsyrdy.
Budan bólek Prezident kómirsýtegin qaita óńdeýde investitsiiany retteýdiń zamanaýi jáne ońtaily tetigin ázirleý qajettigin aitty.
Memleket basshysy jergilikti ónimdi arttyrý máselesine arnaiy toqtaldy. Bul rette ol tehnologiia transfertin jáne óndiristi bir jerge shoǵyrlandyrýdy qamtamasyz etý úshin naqty sharalar ázirleý jóninde Úkimetke bergen tapsyrmasyn eske saldy.
– Men elishilik qundylyq (in-country value) qalyptastyrýda, ishki tehnologiialyq jáne ónerkásiptik damýdy yntalandyrýda energetikalyq jobalardyń mańyzdylyǵyn únemi aityp kelemin. Ókinishke qarai, bul baǵyttaǵy progress máz emes. Bizge tyń ári batyl qadamdar jasaý kerek, – dedi Prezident.
Qasym-Jomart Toqaev Úkimetke kompaniialarmen birlesip, Tehnologiialar transferti men lokalizatsiia jóninde jol kartasyn ázirleýdi jáne bul jaiynda kelesi otyrysta baiandaýdy tapsyrdy.
Memleket basshysy jýyrda qurylǵan Investorlardyń problemasyn sheshý jónindegi front-ofis týraly da aitty. Onyń pikirinshe, bul ofistiń jumysy kásibi, belsendi júrgizilip, biýrokratiialyq resimder barynsha az bolýy kerek. Ofis investorlardyń jumysyna kedergi keltiretin problemalardy sheshýge quzyretti bolýǵa tiis. Eger qajet bolsa, máseleni Premer-Ministr janyndaǵy Munai-gaz keńesiniń deńgeiine kóterý kerek.
Prezident ekologiialyq máselelerge nazar aýdardy. Bul rette Memleket basshysy munai-gaz kompaniialarynyń gazdy fakelderde jaǵyp jiberý kezinde shyǵatyn qaldyqtarǵa salynatyn tólemderdiń ár kelkiligi jónindegi ótinishterin qoldaitynyn atap ótti.
Qasym-Jomart Toqaev bul máselelerge qatysty investorlardan qorshaǵan ortany jaqsartý men kómirtegi qaldyǵyn azaitý jóninde batyl ári naqty is-qimyldar kútetinin málimdedi.
