Foto: Aqorda
Prezident Parlamenttik reforma jónindegi Jumys tobynyń birinshi otyrysynda sóz sóilep, Parlamenttik reforma qalai júretinin túsindirdi, dep habarlaidy Ult.kz.
"Birinshiden, biz barlyq reformany tek evoliýtsiialyq jolmen júrgizemiz. Iaǵni azamattardyń suranysy, tól ereksheligimiz ben elimizdiń túpki múddesi eskeriledi", - dedi ol.
Parlamenttik reforma kezeń-kezeńimen iske asyrylyp kele jatqan aýqymdy saiasi jańǵyrýdyń qisynyna sai keletinin aitty.
"Esterińizde bolsa, saiasi reformalardyń tórt paketi aiasynda parlamenttik oppozitsiia týraly norma bekitilgen edi. Onda ókilderi az partiiaǵa Májilistiń turaqty komitetteriniń birinde tóraǵalyq laýazym atqarý jáne parlamenttik tyńdaý ótkizý týraly bastama kóterý quqyǵyna kepildik berildi.
Budan bólek, partiialar Parlamentke ótýi úshin sailaýdyń tómengi shegi azaityldy. Sodan soń 2022 jyly júrgizilgen konstitýtsiialyq reformanyń arqasynda biz Májilistiń quziretin eleýli túrde keńeittik. Naqty aitqanda, búginde Májilis zań qabyldaidy, al Senat maquldaidy.
Bul alǵashqy qadamdar edi. Endi sońǵy jyldary qoǵamdaǵy saiasi mádeniettiń edáýir óskenin eskere otyryp, biz birte-birte jáne baiypty jolmen bir palataly Parlamentke ótýdi bastaimyz", - dedi Prezident.
Memleket basshysy parlamenttik reforma jáne osyǵan deiin júzege asyrylǵan reformalar bizdiń aimaqta buryn-sońdy bolmaǵan, shyn máninde, jańa basqarý júiesiniń negizin qalaitynyn aitty.
"Sondai-aq taǵy bir mańyzdy máselege nazar aýdarǵym keledi: Parlamentti reformalaý bul – Senatty taratý degen sóz emes. Mundai qate pikirge jol berýge bolmaidy. Bizdiń aldymyzda turǵan maqsat – aiqyn. Biz ókildi bilik tarmaǵyn túbegeili jańǵyrtýymyz kerek. Osylaisha, azamattarymyzdyń múddeleri men tilek-nietin bildiretin zań shyǵarýshy organ múlde jańa sipatqa ie bolady", - dedi ol.
Qasym-Jomart Toqaev birqatar elde «elektrondyq» nemese tsifrlyq parlament» úrdisi kúsheiip jatqanyn aitty. Sondyqtan biz de osy baǵytqa sanaly túrde kúsh salamyz.
"Aldaǵy ýaqytta e-Parlament qazirgi elektrondyq úkimet – e-Gov siiaqty suranysqa ie quralǵa ainalýy múmkin. Sol sebepti bir palataly Parlamentke ótý bir esepten jumystyń jańa qalyby men qarqynyna, tez sheshim qabyldaýǵa beiimdelýdi kózdeidi. Iaǵni zaman ózgerip jatyr, ol óz talabyn oryndatady, e-Parlament júiesi qyr astynda tur. Jaqynda ómirimizge dendep enýi múmkin. Sondyqtan zań qabyldaýda múlde qate jiberýge bolmaidy", - dep qorytyndylady ol.
