Berlinde Qazaqstan Prezidenti Qasym-Jomart Toqaev pen Germaniia Kantsleri Angela Merkel arasyndaǵy kelissózder bastaldy, dep habarlaidy «QazAqparat».
Qazaqstan men Germaniia basshylarynyń saltanatty kezdesýi álemdegi eń kórikti ári eń iri úkimet shtabtarynyń biri sanalatyn Federaldyq kantsler vedomstvosynyń ǵimaraty aldynda ótti. Qazaqstan, Germaniia jáne Eýropalyq odaqtyń jalaýlary kóterilgen kireberiste Angela Merkel Qasym-Jomart Toqaevty iltipatpen qarsy aldy.
Osydan keiin Býndesverdiń bas orkestri Qazaqstan men Germaniianyń Ánurandaryn oryndady. Artynsha Federaldy Kantsler jáne Qazaqstan Prezidenti sap túzegen qurmetti qaraýyl rotasy aldynda júrip ótti. A.Merkel Qazaqstan basshysyn nemistiń resmi ókilderimen, al Q.Toqaev óz kezeginde qazaqstandyq delegatsiia múshelerimen tanystyrdy.
Rásimniń sońynda Qasym-Jomart Toqaev pen Angela Merkel kezdesý bastalǵan Federaldyq kantsler keńsesiniń ǵimaratyna bet aldy. Shamamen bir jarym saǵatqa sozylatyn kelissózderdiń sońynda eki eldiń basshylary BAQ aldyna shyǵady.
Aita keterligi, búgin Qasym-Jomart Toqaev FRG Prezidenti Frank-Valter Shtainmaiermen, Germaniianyń eks-kantsleri Gerhard Shredermen jáne nemis biznesiniń jetekshi ókilderimen de kezdesedi. Qazaqstan Prezidentiniń saparynyń alǵashqy kúniniń resmi baǵdarlamasy Germaniianyń isker toptarymen birlesken túski aspen aiaqtalady. Qazaqstan - Germaniianyń Ortalyq Aziiadaǵy negizgi seriktesi. Ortalyq Aziia aimaǵymen jasalǵan saýda operatsiialarynyń 85 paiyzy - bizdiń elimizge tiesili. Osy jyldyń toǵyz aiynda QR men Germaniia arasyndaǵy taýar ainalymy 1,3 mlrd dollardy qurady.
Germaniiadan Qazaqstanǵa 2005 jyldan bastap osy jyldyń 2-shi toqsanyna deiingi jalpy tikelei investitsiiasy 5,2 mlrd dollarǵa jetip otyr. Germaniia ekonomikasynyń Qazaqstan ekonomikasyna salǵan investitsiialarynyń 90 paiyzdan astamy shikizattan tys sektorǵa tiesili.
