Biz BUU-nyń klimatty jaqsartýdyń alty oń qadamy atty jospary aiasynda kúsh biriktirýge mindettimiz. Bul týraly BUU Bas Assambleiasy 75-sessiiasynyń jalpysaiasi debattarynda sóz sóilegen QR Prezidenti Qasym-Jomart Toqaev aitty, dep habarlaidy "Ult aqparat".
«Klimattyń ózgerýi – bizdiń órkenietimizge qater tóndirip otyrǵan taǵy bir ekzistentsialdy daǵdarys. Bul másele qaýip tóndirip qana qoimaidy, sonymen qatar basqa qaterler úshin «qozǵaýshy kúsh» qyzmetin de atqarady. Adamzat balasy bul jahandyq syn-qaterge tótep berýge áli de qaýqarsyz. Degenmen, koronavirýs indetinen keiingi qaita qalpyna keltirý kezeńinde qorshaǵan ortany qorǵaý taqyrybyn halyqaralyq kún tártibiniń basty máselesi retinde kóterý múmkindigine ie bolyp otyrmyz. Biz BUU-nyń klimatty jaqsartýdyń alty oń qadamy atty jospary aiasynda kúsh biriktirýge mindettimiz», - dedi Memleket basshysy.
Qasym-Jomart Toqaev Qazaqstan úshin ekologiia máseleleri óte ózekti ekendigin basa aitty.
«Aral teńiziniń apatty jaǵdaiy men Semei poligonynyń qasireti, muzdyqtardyń jyldam erýi jáne shóleit jerlerdiń kóbeiýi bizdiń elimiz ben Ortalyq Aziia óńirine ǵana emes, barsha álemge qaýip tóndirip otyr. Qazba otynyna asa qatty táýeldi bolyp otyrǵanymyzǵa, sondai-aq klimat jónindegi Parij kelisimindegi maqsattarǵa qol jetkizýdiń uzaqqa sozylýyna qaramastan, elimiz kómirteksiz ekonomikany damytýǵa qoldaý kórsete beredi», - dedi QR Prezidenti.
Memleket basshysy elimiz ekonomikany jáne kásiporyndardy jańǵyrtý esebinen 2030 jylǵa qarai parniktik gazdardyń qaldyqtaryn 15 paiyzǵa azaitatyndyǵyn atap ótti.
«Buǵan qosa aldaǵy bes jyl ishinde elimizde eki milliardtan astam aǵash kóshetterin otyrǵyzýdy josparlap otyrmyz. Mundai jahandyq syn-qaterlerdi eńserý úshin biz BUU-ǵa múshe memleketter arasyndaǵy ózara senimdi qaita qalpyna keltirýge jáne kópjaqty institýttardy birtindep kúsheitýge tiispiz», - dedi Qasym-Jomart Toqaev.
Sonymen qatar Qazaqstan Prezidenti búginde memleketterdiń bir-birine degen senimi joǵalyp bara jatqandyǵyna airyqsha nazar aýdartty.
«Bul halyqaralyq qatynastardyń damýyna keri áserin tigizedi. BUU Jarǵysynyń negizgi maqsattary men qaǵidattaryna beiildilik tanytý – bizdiń ortaq moraldyq mindetimiz. Senimdi nyǵaitý sharalaryna suranystyń artyp kele jatqanyn eskere otyryp, Qazaqstan Aziiadaǵy ózara is-qimyl jáne senim sharalary jónindegi keńesti osy strategiialyq mańyzdy aimaqtyń qaýipsizdigi men ony damytýdyń tolyqqandy uiymyna ainaldyrýǵa nietti. Álemdik qaýymdastyq tózimdilik, ózara túsinistik jáne mádeni alýantúrlilik ideologiiasyn tabandylyqpen ilgeriletýge tiis dep sanaimyz. Bul – jek kórý jáne tózimsizdikke qarsy tiimdi is-qimyldyń kilti», - dedi Qasym-Jomart Toqaev.
