Qazaqstan Prezidenti Qasym-Jomart Toqaev pen Belarýs Prezidenti Aleksandr Lýkashenko birin-biri Uly Otan soǵysyndaǵy Jeńistiń 75 jyldyǵymen quttyqtady, dep habarlady Aqordanyń baspasóz qyzmeti.
Qasym-Jomart Toqaev Belarýs maidangerleri men tyl ardagerleriniń fashistik agressiiaǵa qarsy kúrestegi kózsiz qaisarlyǵy men eren erligin atap ótip, olarǵa myqty densaýlyq, uzaq ómir tiledi.
Aleksandr Lýkashenko Qazaqstan men Belarýstiń ortaq Jeńiske jetýge zor úles qosqanyn aitty. Sondai-aq barsha Qazaqstan halqyna sheksiz alǵysyn joldap, baq-bereke tiledi.
Áńgimelesý barysynda taraptar pandemiianyń taralýy kezinde halyqqa kómek berý, shaǵyn jáne orta bizneske qoldaý kórsetý úshin der kezinde qabyldanǵan sharalar jóninde aqparat almasty.
Memleketter basshylary eki el úkimetteriniń saýda-ekonomikalyq yntymaqtastyqtyń oń qarqynyn saqtaýǵa jáne Qazaqstan men Belarýs arasyndaǵy strategiialyq seriktestiktiń barlyq salasy boiynsha yqpaldastyqty odan ári arttyrýǵa baǵyttalǵan is-qimyldaryn úilestirý týraly ýaǵdalastyqqa qol jetkizdi.
Sonymen qatar taraptar aldaǵy ýaqytta atqarylatyn ekijaqty is-sharalardyń kestesin jáne kópjaqty uiymdar men forýmdar aiasyndaǵy yqpaldastyqtyń perspektivalaryn talqylady.
Telefon arqyly sóilesýge Qazaqstan tarapy bastamashy boldy.
