Qazaqstan Prezidenti Qasym-Jomart Toqaev AQSh memlekettik hatshysynyń orynbasary Devid Heildi qabyldady, dep habarlaidy "Ult aqparat" Aqordaǵa silteme jasap.
Memleket basshysy «S5+1» formatyndaǵy joǵary deńgeidegi kezdesýge qatysý úshin Nur-Sultan qalasyna kelgen AQSh memlekettik hatshysynyń saiasi máseleler jónindegi orynbasary Devid Heildi qabyldady. Atalǵan format ekonomika, ekologiia jáne qaýipsizdik salalary boiynsha Ortalyq Aziiadaǵy bes el men AQSh arasyndaǵy kópjaqty ózara yqpaldastyqtyń tetigi sanalady.
Kezdesý barysynda taraptar Qazaqstan men AQSh arasyndaǵy strategiialyq seriktestikti keńeitý, terrorizmge qarsy is-qimyldar, sondai-aq Aýǵanstandy áleýmettik-ekonomikalyq turǵydan qalpyna keltirý máseleleri jóninde pikir almasty.
Qazaqstan Prezidenti eki memleket basshylary arasyndaǵy tikelei telefon bailanysy týraly kelisimge qol qoiýǵa múmkindik bergeni úshin Amerika tarapyna rizashylyq bildirdi.
Qasym-Jomart Toqaev pen Devid Heil 2018 jyly qańtarda Vashingtonda ótken Qazaqstannyń Tuńǵysh Prezidenti – Elbasy Nursultan Nazarbaev pen AQSh Prezidenti Donald Tramp kezdesýiniń qorytyndysy boiynsha qol jetkizilgen ýaǵdalastyqtardyń tiimdi júzege asyrylyp jatqanyn atap ótti.
Amerikalyq diplomat Qazaqstandaǵy saiasi ózgeristerdi, sonyń ishinde elimizdiń áleýmettik-ekonomikalyq damýyn jáne demokratiialyq úderisterdi nyǵaitý jónindegi Qazaqstan Prezidentiniń alǵa qoiǵan maqsattary men mindetterin qoldaitynyn atap ótip, olardy iske asyrý úshin kómektesýge daiyn ekenin aitty.
