Qazaqstan Prezidenti Qasym-Jomart Toqaev «Mir» arnasyna bergen suhbatynda Ekinshi dúniejúzilik soǵysqa qatysqan ákesi týraly aityp berdi, dep habarlaidy QazAqparat.
«Ákemniń bala kezinen taǵdyry qiyn boldy. Erte jetim qaldy. Balalar úiinde, sodan keiin internatta tárbielendi. Kóp ýaqyt ótpei soǵys bastaldy. Soǵys ol úshin taǵy da batyldyq pen tózimdiliktiń synaǵy boldy. Ol soǵysta kóp qiyndyqty basynan ótkerdi, onyń úreili synaǵynan ótti. Qorqynysh pen qaiǵy-qasiretti jeńe bildi. Áitse de ákem basqa maidangerler siiaqty soǵys týraly, ásirese óziniń erligi men marapattary týraly aitýdy unatpaityn. Óziniń sezimi, jaýmen alǵash betpe-bet kelýi, jaýyngerlerdiń erligi, batyrlyǵy jáne Jeńispen úige oralýy jaily óziniń «Soldat soǵysqa ketti» atty ómirbaiandyq kitabynda aityp berdi», - dep eske aldy ákesin Qasym-Jomart Toqaev.
Memleket bashsysy ákesiniń bala kezinen bilimge qushtar adam bolǵanyn aityp ótti.
«Ásirese, qazaq tili men ádebietke erekshe qumar edi. Soǵystan keiin ol áskeri forma kigen kúii baldaqpen kelip, Almatydaǵy Qazaq memlekettik ýniversitetiniń filologiia fakýltetiniń birinshi kýrsyna túsedi. Sodan keiin ol jýrnalist bolyp jumysqa ketti. Jazýshylyqpen ainalysty, jyldar ótkennen keiin laiyqty marapat pen ataqqa ie boldy. Ol qazaq ádebietindegi detektiv janrynyń negizin qalaýshy bolyp sanalady. Men jaqynda ákemniń 1945 jyldyń aqpan-maýsym ailarynda aýyr jaraqat alǵannan keiin emdelgen Ombydaǵy soǵys ardagerleri aýrýhanasynyń qasbetine ákeme arnalǵan eskertkish taqta ornatylǵany týraly bildim. Men ákemdi jáne jalpy soǵys ardagerlerin eske alyp, umytpai júrgen Omby oblysy men qala basshylyǵyna rizamyn», - dedi Memleket basshysy.
