Foto: Aqorda
Memleket basshysy Qasym-Jomart Toqaev quqyq qorǵaý organdarynyń keńeitilgen alqa májilisinde sóz sóiledi, dep habarlaidy Ult.kz.
Qasym-Jomart Toqaev elimizdegi politsiia qyzmetkerleri men memlekettik qyzmetshilerdi kásibi meiramdarymen quttyqtap, memleketke qyzmet etý – eń qurmetti ári asa jaýapty mindet ekenin atap ótti.
"Qazir dúnie júzi almaǵaiyp, bulyńǵyr, iaǵni, óte kúrdeli kezeńdi bastan ótkerýde. Osyndai qubylmaly ýaqytta qoǵamdyq qaýipsizdikti saqtaý, zańnyń múltiksiz oryndalýyn qamtamasyz etý – airyqsha mańyzdy mindet.
Sol sebepti, búgin biz alǵash ret osyndai qurammen jinalyp otyrmyz. Quqyq qorǵaý júiesindegi barlyq jaýapty qurylymdar jumyla jumys isteýi qajet", - dedi Prezident.
Memleket basshysy sońǵy jyldary elimizde barlyq salada aýqymdy reformalar jasalyp jatqanyn aitty. Memlekettiń saiasi júiesi men ekonomikalyq qurylymy túbegeili jańǵyrýda.
"2019 jyldan beri qylmystyq quqyqbuzýshylyq sany shamamen eki ese azaidy. Sonyń ishinde qaraqshylyq, tonaý, urlyq pen buzaqylyq deńgeii 4 ese tómendedi, al kisi óltirýge qatysty qylmystar 30 paiyzǵa kemidi. Qoǵamdyq oryndardaǵy qylmys sany 80 paiyzǵa azaidy. Bul – azamattarymyz kóshede eshteńeden qaýiptenbei, alańsyz júre alady degen sóz", - dedi ol.
Sondai-aq Qasym-Jomart Toqaev otbasylyq zorlyq-zombylyqpen kúres jáne áielder men balalardy qorǵaý boiynsha zańnamalyq, institýtsionaldyq turǵydan batyl qadamdar jasalyp jatqanyn aitty.
"Otbasylyq zorlyq-zombylyq jasaǵany úshin beriletin jaza edáýir kúsheitildi. Bir jyl buryn tiisti zań qabyldandy. Zańǵa engizilgen túzetýler men basqa da sharalar naqty nátije bere bastady. Ortasha jáne aýyr deńgeidegi otbasylyq-turmystyq qylmys sany jyl basynan beri 30 paiyzǵa tómendedi.
Jalpy, sońǵy 5 jylda áielderge qatysty quqyq buzýshylyqtar eki ese azaidy. Eń bastysy, qazir qoǵamdyq sana túbegeili ózgerip jatyr. Azamattarymyzdyń boiynda otbasyndaǵy qatigezdik pen ozbyrlyqqa múldem tózbeýshilik qasieti qalyptasýda", - dedi ol.
Memleket basshysy nashaqorlyq pen esirtki biznesine qarsy keshendi jumys atqarylyp jatqanyn da aita ketti. Biyldyń ózinde 83 esirtki zerthanasy joiylyp, ainalymnan alynǵan esirtki zattarynyń kólemi 84 paiyzǵa ulǵaidy. Esirtki óndirgeni úshin beriletin jaza qatańdatyldy. Tipti, ómir boiy bas bostandyǵynan aiyrylýy múmkin ekenin atap ótti.
