Qazaqstandyqtar 12 mamyrdan bastap rejisser Aqan Sataevtyń «Uly dala tańy» tarihi dramasyn kinoteatrlardan kóre alady, dep habarlaidy QazAqparat.
Tarihi kinotýyndy Qazaq handyǵynda Jánibek hannyń uly – Qasym han bilik etken kezderi týraly baiandaidy. Dál osy jyldary Qazaq handyǵy órkendep qana qoimai, Shyǵys Deshti-Qypshaqtyń keń aýmaǵyna baqylaý ornatylyp, qazaqtar derbes etnikalyq qaýymdastyq retinde bizdiń aýmaqtan tys jerlerge de belgili boldy.
Qasym han ádet-ǵuryptyq zańdarǵa arqa súiep, tarihqa «Qasym hannyń qasqa joly» degen atpen engen ózi daiyndaǵan konstitýtsiialyq qujattyń kómegimen el basqardy.
Tarihi kinotýyndynyń stsenariiin belgili kinodramatýrg Bekbolat Shekerov, Nazira Baqaeva jáne Aqan Sataev jazdy.
Qasym hannyń jas kezin Daniiar Orazaev oinaidy, Eresek Qasym han – Berik Aitjanov, Jas Buryndyq han – Aidos Abdyqadyrov, Eresek Buryndyq han – Erik Joljaqsynov. Muhammed Shaibani – Nurlan Álimjanov. Jahan begimniń jas kezin Altynai Nógerbek, Egde Jahan begimdi Shámshagúl Mendiiarova oinaidy. Áli Rashidtiń jas kezin – Qýanysh Qudaibergen, Eresek Áli Rashidti – Tuńǵyshbai Jamanqulov somdaidy.
«Tarihi filmdi túsirýge 2500 adam tartyldy. Olardyń árqaisysy óz jumysyna úlken jaýapkershilikpen qarady. Bizdiń keńesshi-tarihshylarymyzdyń aitýynsha, bul ǵylymi jumysqa uqsas bolǵan. Barlyq tarihi málimetter, faktiler ekranda kórsetiledi. 14 ǵasyr bizdiń halqymyzdyń irgeli kezeńi ekeni belgili», - dedi Aqan Sataev.
Filmniń túsirý jumystary 2021 jyly aqpan aiynyń sońynda Almaty oblysy Panfilov aýdanynda bastalǵan bolatyn.
Naýryzdyń ortasynda túsirilimder «Qazaqfilm» kinostýdiiasynyń pavilondarynda turǵyzylǵan «Syǵanaq qalasy», «Buryndyq hannyń taq zaly» jáne «Samarqand – Shaibannyń aýlasy» dekoratsiialarynda júrgizildi. Jaz ailarynda Qapshaǵai qalasynyń mańynda kúrdeli sahnalardyń biri – Ulytaýdaǵy shaiqas túsirildi. Bul sahnaǵa Nomad Stunts kaskaderler toby arnaiy tartyldy. Filmniń triýkterin Jaidarbek Kúnǵojinov, Esbolat Ábdiberik jáne Ádilet Aqmatov oryndady.
