Foto: Vedomosti/PhotoXPress.ru
Mádeniet jáne sport ministri Ashat Oralov vitse-ministrlerdiń, komitet tóraǵalarynyń jáne baǵynysty mekeme basshylarynyń qatysýymen apparat keńesin ótkizdi. Kún tártibindegi basty taqyryp – kórermenderdiń suranysyna ie kassalyq filmderdi memlekettik tilde dýbliajdaý.
«Jyl basynan Qazaqstanda birneshe iri kinopremera ótti. Olardyń keibiri qazaq tilinde dýbliajdyń bolmaýyna bailanysty kórermenderimizdiń nazarynan tys qaldy. Men halyqtyń pikirin baqylap otyrmyn. Biz bul máseleni eshqashan esten shyǵarmaimyz. Kassalyq filmder aýditoriiaǵa memlekettik tilde qoljetimdi bolýy kerek. Mysaly, byltyr Mádeniet jáne sport ministrliginiń qoldaýymen kórermenderdiń qyzyǵýshylyǵyn týdyrǵan 3 kinopremera qazaq tilindegi dýbliajben shyqty. Biyl biz mádeniet salasyn damytýdyń 7 jyldyq tujyrymdamasyn ázirlep, Úkimet qaýlysymen bekittik. Endi jyl saiyn kem degende 15 kinopremeraǵa qazaq tilinde dýbliaj jasalýy kerek degen mindet qoidyq», - dedi Ashat Oralov.
Aita ketý kerek, Mádeniet jáne sport ministri naýryz aiynda memlekettik tilge dýbliaj jasaý úshin filmderdi irikteý erejesin bekitti. Ministrlik aldaǵy birneshe jylda jalpy prokattaǵy qazaq tilindegi filmderdiń úlesin 30%-ǵa deiin jetkizýge nietti. Bul kórsetkish kassalyq sheteldik filmderge memlekettik tilde dýbliaj jasaý arqyly da artýy tiis.
«Taǵy bir ózekti másele - qazaqsha dýbliajben shyǵatyn kartinalar seansy árdaiym kórermenderge yńǵaily ýaqytta qoiyla bermeidi. Bul týraly da maǵan áleýmettik jelide jii jazady. Filmdi memlekettik tilde kórgisi keletinder kóbinese túnde kinoǵa barýǵa májbúr. Bul, árine, durys emes. Biz kinoteatrlardyń jekemenshik kásip nysany ekenin túsinemiz. Degenmen de memlekettik turǵydan biz dúniejúzi kóretin kinopremeralardyń qazaq tilinde jáne yńǵaily ýaqytta kórsetilýin qamtamasyz etýge mindettimiz. Sondyqtan jeke kásipkerlermen, kinoteatrlardyń ielerimen osy baǵyttaǵy jumysty jandandyrýymyz qajet», - dedi Mádeniet jáne sport ministri Ashat Oralov.
