Kaspii teńizinde Qazaqstan Respýblikasy Áskeri-teńiz kúshteriniń jáne Resei Federatsiiasy Áskeri-teńiz flotiliiasynyń birlesken oqý-jattyǵýy ótýde. Bul týraly QR Qorǵanys ministrliginiń baspasóz qyzmeti habarlady.
Atalmysh oqý-jattyǵýdyń taqyryby – Kaspii teńiziniń soltústik bóligindegi Ekonomikalyq qyzmettiń obektilerin qorǵaý. Qazaqstan Qarýly Kúshteriniń atynan Áskeri-teńiz kúshteri bas qolbasshysy basqarmasynyń jedel toby, áskeri-teńiz bazasynyń bólimshesi, «Oral» jáne «Mańǵystaý» zymyrandy-artilleriialyq korablderiniń, «Jaiyq» gidrografiialyq kemesiniń ekipajdary qatysady. Budan ózge, oqý-jattyǵýǵa maidan ushaqtary men armiia aviatsiiasynyń tikushaqtary jumyldyryldy.
Birlesken oqý-jattyǵýdy Qazaqstan Áskeri-teńiz kúshteriniń bas qolbasshysy kontr-admiral Sáken Bekjanov basqarady.
Oqý-jattyǵý barysynda eki eldiń áskeri teńizshileri Qazaqstan men Resei sý ailaǵynda ornalasqan Kaspii teńiziniń poligondarynda jaýyngerlik oqý-jattyǵý mindetterin oryndaýy tiis.
Atap aitqanda, ekonomikalyq qyzmet obektilerin kúzetý men qorǵaý jónindegi mindetterdi pysyqtap, jaýyngerlik is-qimyldardy júrgizýdiń jańa ádisteri men tásilderin úirenedi. Kemelerdiń ekipajdary shartty áýe qarsylasynyń shabýylyna toitarys berý jónindegi is-sharalar keshenin, áýe jáne teńiz nysandaryna artilleriialyq atystar júrgizýdi oryndaidy.
Sondai-aq shartty túrde apatqa ushyraǵan kemege kómek kórsetý jónindegi mindetterdi pysyqtaidy.
