Atyraý oblysynda bes táýlikten beri qamys órtenip jatyr, dep habarlaidy "Ult aqparat" tótenshe jaǵdailar ministrliginiń baspasóz qyzmetine silteme jasap.
Qazirgi ýaqytta órtený oshaqtaryn joiý boiynsha kúsheitilgen sharalar júrgizilýde. Tútinge qaramastan, eldi mekenderge qaýip joq.
«15 qazanda tańerteńnen beri órtti joiýǵa «Qazaviaqutqarý» AQ-nyń MI-171 tikushaǵy jumyldyryldy. Eki kún ishinde tikushaq 66 tonna kóleminde 22 ret sý shashty. Sonymen qatar, oblystyq TJD-nyń jeke quramynan 55 adam jumyldyryldy. Órtti sóndirý batpaqty jermen jáne ósimdikterdiń qalyń ósýimen ýshyqty, osyǵan bailanysty tehnikanyń barýy qiyndady. Órtti sóndirý aspaly órt sóndirgishter men shartyldaqtardyń kómegimen júzege asyrylýda.
Búgingi kúni órtengen jerdiń jalpy aýdany 1,5 gektardy quraidy, onyń 1,2 gektarysóndirildi. Shamamen 0,3 gektar jerde órtti sóndirý jumystary jalǵasýda. Qazirgi ýaqytta órt teńizge jyljyp barady», - delingen habarlamada.
«Qazaviaqutqarý» AQ «MI-171» tikushaǵy áýeden janý oshaqtaryn sóndirý úshin sý shashý qurylǵysy kómegimen 15 ret sý shashty. Keshke 1 ga alańda birinshi janý oshaǵy sóndirildi, 0,8 ga alańda ekinshi janý oshaǵy sóndirildi.
Oqiǵa ornynda órtti sóndirý jáne bailanysty uiymdastyrý úshin komandalyq-shtabtyq mashina ornatyldy.
Jumyldyrylǵan jeke quram úshin qaýipsiz qashyqtyqta tamaqtanýǵa jáne túneýge arnalǵan shatyrlar tigildi.
Eske salsaq, Kaspii jaǵalaýyndaǵy órt «Aqjaiyq» tabiǵi rezervatynyń aýmaǵyna taraǵandyǵy týraly habarlaǵan edik.
