Kaspii teńizinde qazaqstandyq balyqshylarǵa shekteýler bolmaidy. Bul týraly Senattyń jalpy otyrysynda tiisti zań jobasyn talqylaý kezinde málim boldy, dep habarlaidy QazAqparat.
Aita keteiik, Senatta «Qazaqstan Respýblikasynyń keibir zańnamalyq aktilerine Kaspii teńizinde qyzmetti júzege asyrýǵa bailanysty máseleler boiynsha ózgerister men tolyqtyrýlar engizý týraly» zańynyń jobasy birinshi oqylymda qaraldy.
«Meniń suraǵym Ekologiia, geologiia jáne tabiǵi resýrstar ministrligi men QR Ulttyq qaýipsizdik komitetiniń Shekara qyzmetiniń ókilderine arnalady. Ózderińizge málim bolǵandai, Atyraý oblysynyń turǵyndary úshin balyq sharýashylyǵynyń damýy óte mańyzdy másele bolyp tabylady. Alaida, balyq aýlaý aimaqtarynda balyq kooperativteri men Shekara qyzmeti organdary arasynda birqatar túsinispeýshilikter jii kezdesip turady. Bul zań jobasynda balyqshylardyń múddeleri qanshalyqty eskerilgen? Sonymen qatar, jobadaǵy normalar elimizdiń balyq aýlaý salasynyń damýyna qalai áser etpek?», - dep surady senator Saǵyndyq Luqpanov.
Óz kezeginde QR Ekologiia, geologiia jáne tabiǵi resýrstar vitse-ministri Serik Qojaniiazov zań jobasy aiasynda balyqshylarǵa eshqandai shekteýler bolmaitynyn atap ótti.
«Kerisinshe balyqshylardyń múddeleri qorǵalady, iaǵni Kaspii teńizinde bizdiń balyq aýlaý aýmaǵy ulǵaiady. Sonymen qosa, balyq aýlaý keńistigi paida bolyp otyr, ol on mil tóńireginde bolady. Zańda balyq aýlaýǵa, teńizge shyǵýǵa tek qana kúnniń jaryq kezinde jol berilse, osy qujattyń aiasynda ózgeris engizilip, balyq aýlaityn teńiz quraldaryna túngi ýaqytta da júrýge ruqsat berilmek», - dedi S. Qojaniiazov
Sonymen qatar QR Ulttyq qaýipsizdik komiteti tóraǵasynyń orynbasary – Shekara qyzmetiniń direktory Darhan Dilmanov Atyraý jáne Mańǵystaý oblystary balyq aýlaý sharýashylyqtary men jaǵalaý kúzeti bólimsheleriniń ózara is-qimyly máselesi turaqty baqylaýda ekenin jetkizdi.
«Biz osy máselelerdi únemi rettep kelemiz, sondai-aq balyq aýlaý sharýashylyqtary paidasyna sheshim jasaimyz. 2020 jyly balyq aýlaýǵa teńizge shyǵatyn Qazaqstannyń 7 myń azamaty tirkeldi. Zań jobasy boiynsha balyq aýlaý sharýashylyqtary endi táýlik boiy jumys istei alady», – dedi D. Dilmanov.
