Prezident Qasym-Jomart Toqaev Mańǵystaý jurtshylyǵymen kezdesýinde óńirde birqatar kúrdeli ekologiialyq problema bar ekenin atap ótti, dep habarlaidy "Ult aqparat" Aqordanyń baspasóz qyzmetine silteme jasap.
"Ekologiia máselelerin sheshý qajet. Bul salada kúrdeli túitkilder bar ekenin jaqsy bilesizder. Ekologiialyq tepe-teńdik pen Kaspiidiń bioalýandyǵyn saqtaý – mańyzdy mindet.
Búginde itbalyqtar men balyqtardyń jappai qyrylýy jiilep ketti. Buǵan adam faktory jáne ekologiialyq ahýaldyń ózgerýi áser etip jatyr. Itbalyq Qazaqstannyń Qyzyl kitabyna engen. Bul janýardyń joiylyp ketpeýin jáne onyń sanyn burynǵy qalpyna jetkizýdi men tikelei baqylaýda ustap otyrmyn.
Jazda Ortalyq Aziia ekologiialyq zertteýler institýtyna bardym. Bul mekeme itbalyqtardyń azaiý sebebin zertteidi. Mundai mańyzdy máselege keshendi ǵylymi zertteý júrgizý qajet. Buǵan deiin Mańǵystaý oblysyndaǵy itbalyqtardy saqtaý úshin memlekettik tabiǵi qoryqtar qurý josparlanǵan bolatyn. Ekologiia ministrligi bul jumysty tezdetip, tiisti sheshim qabyldaýy kerek", - dedi Memleket basshysy.
Prezidenttiń aitýynsha, itbalyqtar men balyqtardyń jappai qyrylýyn anyqtaý úshin Kaspii teńiziniń aidyny men jaǵalaýynda zertteý jumystaryn turaqty júrgizgen jón.
"Úkimet ókiletti organdardy teńizde jumys isteýge qajetti materialdyq-tehnikalyq quraldarmen qamtamasyz etýge tiis. Kaspiide zańsyz balyq aýlaýdyń jolyn kesý qajet.
Brakonerler balyqtyń kóbeiýine kesirin tigizip, teńizdiń ekojúiesine zardap keltirip jatyr. Kaspii teńiziniń tartylýy – airyqsha ózekti máseleniń biri. Teńiz deńgeii 2005 jyldan beri bir metrden asa tómendep ketkenine bárimiz kýámiz. Sýdyń tartylý sebebi men onyń saldaryn jan-jaqty zertteý kerek.
Osy oraida, Kaspii teńizin zertteýmen ainalysatyn memlekettik ǵylymi institýt qurǵan jón dep esepteimin. Sondai-aq, Úkimet Kaspii jaǵalaýynda ornalasqan ózge memleketterdegi áriptesterimen tyǵyz jumys isteýi kerek" - dedi Toqaev.
