«Kaspii qubyr konsortsiýmyndaǵy apat týraly nege Resei taraby ǵana aqparat taratyp, Qazaqstan taraby rastap qana otyrdy? Bul oqiǵa boiynsha diversiia yqtimaldyǵyn qarastyrasyzdar ma? Ortalyq kommýnikatsiialar qyzmetinde ótken brifingide QR Energetika ministri Bolat Aqsholaqovqa osyndai suraq qoiyldy, dep habarlaidy QazAqparat.
«Kaspii qubyr konsortsiýmy boiynsha diversiia nusqasyn múlde qarastyrmaimyz. Tehnikalyq astardan basqa eshteńe kórip turǵan joqpyz. Qoiyp otyrǵan suraǵyńyzdyń oryndy tusy bar. Mundai nysandar daýyl siiaqty shetin jaǵdailarǵa daiyn bolýy kerek ekeni ras. Óitkeni Qara Teńiz mazasyz. Ol jerde port salǵan kezde osynyń bári eskeriledi. «Eskini jamaǵannyń esi ketedi» degen jaqsy sóz bar. 10 jyl boiy 7 baldyq daýyldarǵa tótep berse de, ýaqyt ótke kele tozýy múmkin. Adam da jyldar óte qartaiady. Qondyrǵylar da ýaqyt ótken saiyn jańarmaidy. Keide tehnikalyq bólikte aqaý bolý úshin kishigirim oqiǵa da jetip jatady. Qazir bul týraly aitý maǵan qiyn. Óitkeni port ózge eldiń iýrisdiktsiiasynda ornalasqan. Óz sarapshylarymdy, qadaǵalaýshylarymdy ol jaqqa jibere almaimyn», - dedi ministr.
Vedomstvo basshysy Kaspii qubyr konsortsiýmy jekelegen bir memlekettiń menshigindegi kásiporyn emes ekenin eske saldy.
«Port pen onyń ailaqtary Kaspii qubyr konsotsiýmynyń menshiginde. Ony túrli azamattar basqarady. Arasynda bizdiń azamattar da, Reseidiń azamattary da bar. Biraq bul kompaniia quramyna kóptegen Batys kompaniialary kiretin konsortsiýmnyń múddesine jumys isteidi. Iaǵni, qazaqstandyq jáne reseilik kompaniialarmen birge kóptegen eýrorpalyq, amerikalyq kompaniialar qatysyp otyr. Sondyqtan, onda jaldanyp jumys isteitin personal qandai da bir elge emes, Kaspii qubyr konsortsiýmyna jumys isteidi. Qandai da bir eldiń múdedsine emes, jobanyń múddesine jumys isteidi. Konsortsiým basshylyǵynyń málimetine senbeýge mende eshqandai negiz joq.
Birneshe kún boldy tyǵyz bailanystamyz. Degenmen naqty kórinis belgisiz. Óitkeni keshe daýyl bolǵandyqtan súńgýirler túse almady. Olardyń zertteýi bolǵan joq. Keshe keshke daýyl basylyp, súńgýirler búgin tústi. Endi solardan málimet kútip otyrmyn», - dedi Bolat Aqsholaqov.
