QR Premer-Ministri Álihan Smaiylov pen «Kaspii Qubyr Konsortsiýmy» AQ bas direktory Nikolai Gorban qazaqstandyq munaidy eksportqa tasymaldaý boiynsha yntymaqtastyq máselelerin talqylady, dep habarlaidy "Ult aqparat" primeminister.kz saityna silteme jasap.
Kezdesý barysynda atap ótilgendei, qazirgi kezde munai qubyrynyń ótkizý qabiletine qoiylǵan shekteýler alynyp tastaldy jáne qazaqstandyq júk jóneltýshilerden munai qabyldaý tolyq kólemde qalpyna keltirildi. Ailaqtyń barlyq qurylǵylary jumys istep tur.
«KQK teńiz terminalynda zaqymdalǵan jyljymaly ailaq qurylǵylaryn jóndeý jumystary aiaqtalǵanyna qýanyshtymyz. Bul shekteýlerdi alyp tastaýǵa jáne Qazaqstanda munai óndirýdi tolyq kólemde qalpyna keltirýge múmkindik berdi», — dedi Premer-Ministr.
Álihan Smaiylov Teńiz ken ornyn bolashaqta keńeitý jobasy aiaqtalǵannan keiin qosymsha munai kólemin tasymaldaý úshin KQK qubyr júiesiniń osal jerlerin joiý jobasyn ýaqytyly iske asyrýdyń mańyzdylyǵyna toqtaldy.
«KQK munai qubyryn odan ári apatsyz jáne úzdiksiz paidalanýdy qamtamasyz etý asa mańyzdy. Bul úshin barlyq qajetti sharalardy qabyldaý kerek dep sanaimyn», — dedi Úkimet basshysy.
KQK munai qubyry Teńiz, Qarashyǵanaq jáne Qashaǵan iri ken oryndarynan munai eksporttaýdyń eń tóte jolyn jáne neǵurlym tiimdi ekonomikalyq jaǵdailardy qamtamasyz etedi. 2021 jyly Qazaqstannan qubyr arqyly 53,1 mln tonna munai, 2022 jylǵy qańtar-sáýir ailarynda 18,7 mln tonna munai tasymaldandy.
