Mańǵystaý oblysynda Kaspii teńizine batyp ketken 27 jastaǵy er adamnyń máiiti alty kúnnen keiin tabyldy, dep habarlaidy ult.kz.
Qaiǵyly oqiǵa 21 maýsym kúni Aqtaý qalasynan 56 shaqyrym qashyqtyqtaǵy jabdyqtalmaǵan jaǵalaý aýmaǵynda bolǵan.
Tótenshe jaǵdailar qyzmetiniń málimetinshe, izdeý jumystary birneshe kúnge sozylǵan. Alaida teńizdegi qatty daýyl súńgýirlerdiń jumysyn qiyndatyp, sý astyndaǵy izdeý sharalaryn tek aýa raiy qolaily bolǵan kezde júrgizýge múmkindik bergen.
Izdestirý jumystaryna Tótenshe jaǵdailar departamentiniń qyzmetkerleri, súńgýirler, Ulttyq ulan men Áskeri-teńiz kúshteriniń áskeri qyzmetshileri qatysty. Sondai-aq arnaiy tehnika, júzý quraldary jáne sýasty drony qoldanyldy.
27 jastaǵy azamattyń máiiti 26 maýsym kúni saǵat 18:30 shamasynda tabyldy. Qutqarýshylardyń aitýynsha, teńiz aǵysy marqumnyń denesin Aqtaýdan shamamen 65 shaqyrym jerge, demalys oryndarynyń biriniń mańyna deiin alyp ketken.
