Qazaqstanda Mańǵystaý oblysyndaǵy Kaspii teńizinde bolǵan qaiǵyly oqiǵaǵa qatysty jalǵan aqparat taratqan birqatar adam jaýapqa tartyldy, dep habarlaidy ult.kz.
Ortalyq kommýnikatsiialar qyzmeti janyndaǵy Dezinformatsiiaǵa qarsy kúres ortalyǵy áleýmettik jelilerde Kaspiidegi tragediiaǵa qatysty rastalmaǵan aqparattardyń taralýy jalǵasyp jatqanyn málimdedi.
Eske salaiyq, áskeri oqý-jattyǵý kezinde Kaspii teńizinde 14 áskeri qyzmetshi qaza taýyp, taǵy úsheýi qutqarylǵan bolatyn.
Ortalyqtyń málimetinshe, áleýmettik jelilerde oqiǵaǵa qatysy joq arhivtik videolar, basqa elderde túsirilgen materialdar, jasandy intellekt kómegimen jasalǵan kontent jáne oqiǵanyń sebepterine qatysty rastalmaǵan nusqalar taraǵan. Sondai-aq mamandar jańadan ashylǵan anonimdi akkaýnttar men úilestirilgen áreket belgileri bar jazbalardy anyqtaǵan.
Taraǵan aqparattardyń biri qaza tapqandardyń naqty sany jasyrylyp jatyr degen nusqaǵa qatysty boldy. Ortalyq bul málimetti joqqa shyǵaryp, izdeý jumystary barysynda resmi derekterdiń ózgerip otyrǵanyn, al operatsiia qorytyndysynda qaza tapqan áskeri qyzmetshiler sany 14 adam bolǵanyn habarlady.
Áleýmettik jelilerde áskeri qyzmetshilerdi tikushaqtan desant túsirgen degen aqparat ta taraǵan. Ortalyqtyń málimetinshe, tergeý materialdarynda áskeri qyzmetshilerdiń katermen tapsyrma oryndaǵany kórsetilgen. Al oqý-jattyǵýdy uiymdastyrý, qaýipsizdik sharalarynyń saqtalýy jáne laýazymdy tulǵalardyń áreketine qatysty túpkilikti qorytyndyny tergeý anyqtaidy.
Sonymen qatar qaza tapqan áskeri qyzmetshilerdiń komandiri mas kúiinde bolǵan degen aqparat taraǵan. Ortalyq mundai málimdemeni rastaityn negiz jariialanbaǵanyn atap ótti. Komandirdiń ózi de áskeri qyzmetshilermen birge qaza tapqan.
Ortalyq áleýmettik jelilerde taraǵan eki videony da teksergen. Onyń birinde qaitys bolǵan adamnyń denesin tasymaldaý kórinisi beinelengen. Bul video Kaspiidegi qaiǵyly oqiǵadan buryn, tamyz aiynda internette jariialanǵan. Al traýr kúnderi Kaspii jaǵalaýynda túsirilgen degen ekinshi video shyn máninde Marokkonyń Tanjer qalasynda túsirilgen.
Sondai-aq tragediianyń mán-jaiy tergelmei jatyr degen aqparat ta shyndyqqa sáikes kelmeitini aityldy. Oqiǵadan keiin Úkimettik komissiia qurylyp, qylmystyq ister qozǵaldy. Budan bólek, Prezidenttiń ókimimen Qorǵanys ministrliginiń qyzmetine keshendi tekserý júrgizý jónindegi komissiia jasaqtaldy.
Ortalyqtyń habarlaýynsha, Mańǵystaýdaǵy oqiǵaǵa qatysty jalǵan aqparat taratqany úshin quqyq qorǵaý organdary birqatar adamdy jaýapqa tartqan.
Vedomstvo azamattardy rastalmaǵan aqparatty taratpaýǵa shaqyrdy. Jalǵan aqparat taratqany úshin Qylmystyq kodekstiń 274-babynda jaýapkershilik qarastyrylǵan. Mass-media, telekommýnikatsiia jelileri nemese onlain-platformalar arqyly kórineý jalǵan aqparat taratqan jaǵdaida úsh jylǵa deiin bas bostandyǵyn shekteý nemese aiyrý jazasy kózdelgen. Al mundai áreket iri zalalǵa nemese ózge de aýyr zardaptarǵa ákep soqsa, jaza bes jylǵa deiin bas bostandyǵynan aiyrýdy qamtýy múmkin.
