Kaspi Bank burynǵy qyzmetkerin izdep jatyr. Ol týraly aqparat berýshige 10 mln teńge syiaqy taǵaiyndaldy, dep habarlaidy "Ult aqparat" banktiń Instagram paraqshasyna silteme jasap.
Pavlodar qalasynda Kaspi Bank qyzmetkeri bolǵan Rýslan Seksembaev bank klientterin kepildegi jyljymaityn múlikti satyp alýǵa kómektesemin degen ýádemen óziniń shotyna qarajat aýdartyp otyrǵan.
«Qazir politsiia izdeý jumystaryn júrgizip jatyr. Kaspi qylmyskerdi taýyp, jazalaý, klientterdiń múddelerin qorǵaý maqsatynda quqyq qorǵaý organdarymen belsendi jumys júrgizýde. Alaiaqtyń qazirgi ornalasqan jeri týraly aqparat úshin Kaspi 10 000 000 teńge mólsherinde syiaqy taǵaiyndaidy», - delingen habarlamada.
Bank ókilderi kúdikti týraly derekterdi +7 705 211 16 93 telefon nómiri arqyly Kaspi-diń qaýipsizdik qyzmetine habarlaýǵa bolatynyn aityp otyr.
«Eger siz nemese sizdiń jaqyndaryńyz osy adamnyń áreketterinen zardap shekseńizder, Pavlodar qalasynyń quqyq qorǵaý organdaryna aryzben júginýińizdi suraimyz. Bankpen jasalatyn barlyq qarjylyq qatynastardyń shartpen bekitiletinin esterińizge salamyz. Bank eshqashan bireýdiń shotyna qarajat aýdarýdy talap etpeidi», - delingen aqparatta.
