QR kásipodaqtar federatsiiasy elimizdegi jaǵdaiǵa bailanysty úndeý jariialady, dep habarlaidy "Ult aqparat".
«Búgingi tańda bizdiń elimiz álemniń kóptegen elderi siiaqty qiyn kezeńderdi bastan ótkerýde. Munai baǵasynyń quldyraýy jáne koronavirýstyq pandemiia Qazaqstan úshin tótenshe syrtqy qaýip bolyp tur. Koronavirýstyq infektsiianyń taralýyn boldyrmaý máselesi el basshylyǵynyń baqylaýynda. Kásipodaqtar federatsiiasy Prezidenttiń tótenshe jaǵdaidy engizý týraly sheshimin, Qazaqstan Respýblikasy Úkimetiniń biýdjet shyǵystaryn azaitý, aimaqtardaǵy jumyspen qamtýdy qamtamasyz etý jáne eldiń aqsha-qarjy naryǵyn turaqtandyrý jónindegi sharalar qabyldaý qajettigi týraly úndeýin qoldaidy», - delingen Úndeýde.
Sonymen qatar, federatsiia óz múshelerine, áleýmettik áriptesterge oryn alǵan qaýipterdi azaitý men qoǵamdaǵy jaǵdaidy turaqtandyrý úshin kúsh biriktirý qajet ekendigin jetkizedi.
«Atap aitqanda, Qazaqstan Respýblikasynyń Úkimetin, jumys berýshiler men ekinshi deńgeili bankterdi:
- qoǵamdaǵy áleýmettik turaqtylyqty saqtaý sharalaryn qabyldaý kezinde áleýmettik áriptestiktiń barlyq taraptarynyń pikirin eskerý men súienýge;
- jumysshylardyń jappai bosatylýyna, jalaqy boiynsha bereshek pen áleýmettik aýdarymdardyń tólenbeýine, jalaqynyń tómendeýine, eńbek jaǵdaiynyń negizsiz nasharlaýyna jol bermeýge;
- qyzmetkerlerdi jeke qorǵanysh quraldarymen qamtamasyz etý, jumys oryndary men keńselerde qaýipsiz jaǵdailar jasaý, jumys rejimin qazirgi zamanǵy bailanys quraldaryn qoldana otyryp, qashyqtan jumys isteý jolymen qalyptasqan jaǵdaiǵa beiimdeýge;
- tótenshe jaǵdai engizilgen merzimde nesielik tólemder men paiyzdyq ósimderdi tóleýden ýaqytsha bosatý múmkindigin qarastyrýǵa shaqyramyz», - delingen Úndeýde.
«Salalyq kásipodaqtarǵa, kásipodaqtardyń aýmaqtyq birlestikterine, kásipodaq uiymdaryna, kásipodaq múshelerine:
- áleýmettik áriptestermen birigip qoǵamda áleýmettik turaqtylyqty saqtaýǵa at salysýdy, eńbek ujymdarynda tótenshe jaǵdai talaptaryn saqtaý qajettiligi týraly túsindirý jumystaryn júrgizýdi;
- jumysshylardyń jappai jumystan shyǵarylýyn boldyrmaýǵa, eńbekaqy men áleýmettik tólemderdi ýaqtyly tóleýge kásipodaqtyq baqylaýdy kúsheitýdi;
- eńbek zańnamasynyń, ujymdyq sharttardyń saqtalýyn baqylaýdy kúsheitýdi;
- áleýmettik áriptestermen birge jumys berýshilermen keńese otyryp, eńbek zańnamasynyń saqtalýy máselelerindegi atap aitqanda, eńbekaqynyń ýaqtyly tólenýin, kásiporyn jumysy májbúrli toqtaǵandaǵy jáne ýaqytsha eńbekke jaramsyzdyq tólemin tóleýdi, karantinge bailanysty úide balalarymen otyrýǵa májbúr bolǵan qyzmetkerlerge aqyly eńbek demalysyn berýdi, qyzmetkerlerge aiyppulsyz bos ýaqyt berý jáne kesteden tys eńbek demalysyn berý múmkindikterin qarastyrý jumystaryn jandandyrýdy;
- virýstyń ýaqtyly anyqtalýy jáne onyń taralýyn boldyrmaýda aýyzbirshilik tanytyp, meditsinalyq qyzmetterdiń jumysyna kómektesýdi;
- qoǵamda dúrbeleń týdyrmas úshin ujymdarda meditsinalyq qyzmetkerlerdiń qatysýymen aýrýdan aiyǵý oqiǵalaryn eskerte otyryp, aýrýdyń aldyn-alý sharalaryn, sonymen qatar jeke bas gigienasy, tamaqtaný jáne t.b máselelerdi egjei-tegjeili túsindirý jumystaryn júrgizýdi;
- túrli áleýmettik-eńbek máselelerin (qyzmetkerlerdi jumystan bosatý, jalaqyny tólemeý, eńbek jaǵdaiynyń nasharlaýy, eńbek zańnamasynyń buzylýy jáne t.b.) sheshý maqsatynda bastaýysh kásipodaq uiymy jáne kásipodaq múshelerimen tikelei bailanys ornatýdy;
- jumysshylardyń quqyqtary buzylǵan jaǵdaida habarlasý úshin áleýmettik jelilerde «jedel jeli», Kásipodaq ortalyqtarynda senim telefondarynyń úzdiksiz jumys isteýin qamtamasyz etýdi;
- jumysshylardyń ótinishterine jedel jaýap berý úshin kásipodaqtardyń zań qyzmetterin onlain rejimine kóshirý qajettiligin qarastyrýdy usynamyz.
Barlyq azamattardy úreige boi aldyrmai, qaýipsizdik erejelerin saqtaýǵa jáne azamattyq jaýapkershilik kórsetýge shaqyramyz.
Adam ómirin qorǵaý basqa qundylyqtardyń bárinen joǵary turýy tiis. Qiyndyqty birlesip qana eńsere alamyz. Sondyqtan aýyzbirshilik tanytaiyq.
Atalǵan qaýipterdi azaitý boiynsha bizdiń birlesken is-qimyldarymyz jáne belsendi jumysymyz azamattardyń áleýmettik ál-aýqatyn, ómiri men densaýlyǵyn saqtaýǵa yqpal etetinine senimdimiz», - delingen úndeý mátininde.
