Aýyl sharýashylyǵyn qarjylai qoldaý qory («QazAgro» holdinginiń enshiles kompaniiasy) «Eńbek» nátijeli jumyspen qamtýdy jáne jappai kásipkerlikti damytý baǵdarlamasy aiasynda kásipkerlerge jeńildetilgen shaǵyn nesie berýge 36 mlrd teńge bóledi, dep habarlaidy "Ult aqparat".
Nátijeli jumyspen qamtý baǵdarlamasy boiynsha túrli maqsattaǵy nesieniń jyldyq syiaqy mólsheri 6 paiyzdy quraidy. Sondai-aq, tiimdi jyldyq syiaqy mólsheri 6,7 paiyzdan aspaidy.
Nesieniń somasy, jeńildik merzimi nesie ónimine bailanysty ártúrli bolady. Qordyń nesieleý shartynda agrariiler qyzmetiniń ereksheligi, onyń ishinde aýyl sharýashylyǵy jumystarynyń maýsymdylyǵy men tsikldiligi eskerilgen.
Baǵdarlamaǵa aýyl sharýashylyǵymen jáne aýyl sharýashylyǵyna jatpaityn kásip túrlerimen ainalysqysy keletinder, kásibin keńeitýdi josparlaǵan azamattar qatysa alady. Nesie alýshylarǵa qoiylatyn birqatar talaptar bar. Atap aitqanda, kásibin endi bastaityn azamattyń kásipkerlik negizderin oqyǵany týraly sertifikaty bolýy tiis.
«Týyndaǵan suraqtar boiynsha oblystardaǵy filial menedjerlerine habarlasýǵa bolady. Qosymsha Kásipkerler palatasynyń aýdandyq filialdarynan da keńes ala alasyzdar», - delingen atalǵan qordyń málimetinde.
«Aýyl sharýashylyǵyn qarjylai qoldaý qory» AQ - «QazAgro» Ulttyq basqarýshy holdinginiń quramyna kiretin mamandandyrylǵan qarjy-nesielik uiym. Qordyń negizgi mindeti – agroónerkásip kesheni salasyndaǵy basymdyqqa ie salalar boiynsha aýyl kásipkerligin qarjylandyrý.
Qor 2013 jyldan beri shaǵyn kásipkerlikti qoldaýǵa baǵyttalǵan birqatar memlekettik baǵdarlamanyń qarjy operatory retinde jumys istep keledi. Kompaniia 2017 jyldan beri 2017-2021 jyldarǵa arnalǵan «Eńbek» nátijeli jumyspen qamtýdy jáne jappai kásipkerlikti damytý baǵdarlamasynyń ekinshi baǵytyn iske asyrýda.
