Endi quqyq qorǵaý organdary qyzmetkerlerine bizneske aralasqany úshin 2 jyldyń ornyna, 5 jylǵa deiingi bas bostandyǵynan aiyrý jazasy qoldanylýy múmkin. Bul týraly «Antikor ortalygy» alańynda ótken brifingte Nur-Sultan qalasy boiynsha sybailas jemqorlyqqa qarsy is-qimyl departamentiniń basshysy Shyńǵys Qabdýla aitty, dep habarlaidy QazAqparat.
«Prezident óziniń qyrkúiektegi Joldaýynda, memlekettik qurylymdardyń kásipkerlik qyzmetke kez kelgen zańsyz aralasýy, kásipkerlerdiń jumysyna kedergi jasaý memleketke qarsy aýyr qylmys retinde qabyldanýy kerek dep atap ótti. Kásipkerlikti damytý men qorǵaý árqashan el basshylyǵy saiasatynyń basymdyǵy bolyp keledi. Sybailas jemqorlyqqa qarsy is-qimyl agenttigi de, osy mindetti sheshýge baǵyttalǵan», - deidi Nur-Sultan qalasy boiynsha sybailas jemqorlyqqa qarsy is-qimyl departamentiniń basshysy Shyńǵys Qabdýla.
Onyń aitýynsha, 2018 jyldan bastap, Agenttik Syrtqy ister ministrligimen, «Atameken» UKP-men birlesip biznes pen investitsiialardy qorǵaý boiynsha arnaiy jobany iske asyryp keledi.
«Bul kásipkerlerdi josyqsyz laýazymdy tulǵalar tarapynan yqtimal qysymnyń, zańsyz syiaqy talaptarynyń aldyn alý maqsatynda memlekettik qurylymdarmen jáne t.b. olardyń ózara árekettesý protsesinde súiemeldeýden turady. Búgingi tańda jalpy somasy 16,2 trln teńgeden asatyn «Sybailas jemqorlyqqa qarsy súiemeldeýdiń» 613 biznes-jobasy bar. Biznesti qorǵaýdy kúsheitý konteksinde, kásipkerlerdiń jumysyna kedergi keltirmeý maqsatynda Qylmystyq kodekske jaýapkershilikti kúsheitetin túzetýler engizildi. Endi quqyq qorǵaý organdary qyzmetkerleriniń bizneske aralasqany úshin 2 jyldyń ornyna, 5 jylǵa deiingi bas bostandyǵynan aiyrý jazasyn qoldaný qaýpi bar.
Quqyq qorǵaý organdary basshylyǵynyń jáne sýdialardyń osyndai áreketterdi jasaýy odan da qatań jazaǵa – iaǵni, 8 jylǵa deiin bas bostandyǵynan aiyrýǵa ákep soǵady», - deidi ol.
