Foto: ál-Farabi atyndaǵy QazUÝ-dyń Baspasóz qyzmeti

Ál-Farabi atyndaǵy Qazaq ulttyq ýniversitetiniń Basqarma Tóraǵasy – Rektor Janseiit Túimebaev Hainan kásiptik ǵylym jáne tehnologiialar kolledjiniń vitse-prezidenti Pan Lin bastaǵan delegatsiiamen kelissóz júrgizdi.

Kezdesýde eki tarap yntymaqtastyq aiasynda birlesip qazaq, orys, aǵylshyn, qytai tilderin jetik biletin kásibi aýdarmashylardy daiarlaý boiynsha ózara pikir almasty.

Júzdesý barysynda Janseiit Túimebev Pan Lin bastaǵan delegatsiianyń ýniversitetke sapary ekijaqty qarym-qatynasty damytýǵa tyń serpin beretinin jáne jańa deńgeige kóterýge múmkindik jasaitynyn atap ótti.

«Ál-Farabi atyndaǵy QazUÝ-da 26 myńnan astam stýdent bilim alady. Sonyń ishinde 4 myńnan astam bilim alýshy jas shetelden kelgen. Qazirgi tańda oqý ordasynda 970 qytailyq stýdent oqyp jatyr. Bolashaqta týrizm salasynda ortaq jumys isteýge eki jaqtyń múmkindigi mol dep sanaimyn. Búginde aǵylshyn jáne qytai tilderin jetik meńgergen mamandar sirek. Sondyqtan aldaǵy ýaqytta QazUÝ qazaq, aǵylshyn, orys jáne qytai tilderin joǵary deńgeide bilip shyǵatyn aýdarmashylardy daiarlai alady. Osy baǵyttaǵy jumystardy birlesip qolǵa alý qajet dep esepteimin», – dedi rektor.

Óz kezeginde Pan Lin áriptestik bailanystardy damytýǵa baǵyttalǵan birqatar usynysyn ortaǵa saldy.

«Qazir Qytai ǵylymǵa qatty kóńil bólýde. Sondyqtan eki bilim ordasy birge  ǵylymi baǵyttaǵy seriktestikti jańa baǵytta damytatynyna senimdimin. Áriptestikti nyǵaitý maqsatynda ortaq halyqaralyq ǵylymi sharalardy ótkizýdi jáne stýdentter almasý jumysyn jandandyrýdy usynamyn», – dedi kolledj vitse-prezidenti.

Júzdesý qorytyndysy boiynsha taraptar ekijaqty seriktestikti damytýǵa baǵyttalǵan barlyq bastamalardy qoldaitynyn aityp, atalǵan jumystardy júieli túrde júzege asyrýǵa ýaǵdalasty.

Qaragóz Serikqyzy,

ál-Farabi atyndaǵy QazUÝ, Baspagerlik, redaktorlyq jáne dizainerlik óner

kafedrasynyń oqytýshysy.